Nga Blendi Gashi
Një prej njerëzve më të fuqishëm në Kosovë, ish-deputeti i PDK-së, Azem Syla i njohur në luftë si “Daja” përfundimisht më s’do ketë punë me ndërkombëtarët, konkretisht misionin për sundimin e ligjit, EULEX, pasi gjykimi ndaj tij dhe 21 tjerëve në rastin e njohur “Toka”, lidhur me tjetërsimin e pronave shoqërore do të bëhet nga gjyqtarët vendas.
Këtë e ka konfirmuar kryetari i trupit gjykues i EULEX-it, Petko Petkov, pa dhënë detaje pse heqin dorë nga ky rast.
Por jo të gjithë brenda këtij misioni pajtohen me një vendim të tillë. Prokuori Danilo Cecarrelli është shprehur kritik ndaj misionit ku punon për vendimin në fjalë.
“Transferimi i këtij rasti tek vendorët domethënë që është përfundim i rastit dhe të gjithë e dimë se pse”, tha Cecarelli.
Ai e quajti turp dhe dështim, vendimin për transferim.
“Ky është dështimi më i madh i EULEX-it, e jo skandalet idiote të EULEX-it që nuk ekzistuan asnjëherë. Ky është misioni ynë, të japim drejtësi dhe po këtu kemi dështuar”, tha prokurori Cecarrelli.
Në fund, prokurori Cecarrelli përmendi personat të cilët, sipas tij kanë vendosur që të transferohet ky gjykim te vendorët, por emrat e të cilëve nuk do të dihen asnjëherë.
“Dhe duhet të jemi të qartë që ky nuk është një vendim i imi apo i trupit gjykues por është i dikujt tjetër, i dikujtë që nuk do e dijmë asnjëherë. Ky është personi që kurrë nuk do të dihet kush është – nuk do të dihet emri i tij”, shtoi Cecarrelli.
Ai kërkoi që deklarate e tij të “jetë në procesverbal, dua që të jetë zyrtare dhe dua që kjo të dihet nga të gjithë’.
Pse me vendorët rasti mund të quhet i mbyllur…
Transferimi i këtij rasti tek vendorët padyshim se mund të quhet një lajm i mirë për Azem Sylën duke ditur se ç’sistem i brishtë i drejtësisë ekziston dhe si 19 vjet paslufte nuk kanë arritur ta çojnë prapa grilave asnjë prej “peshqve të mëdhenj”.
Dhe vet deklarata e prokurorit të EULEX-it, Danillo Ceccarelli se “transferimi i këtij rasti tek vendorët është përfundim i rastit dhe të gjithë e dimë se pse”, flet mjaft. Pra ai dyshon se “Daja” i ka në dorë gjykatësit dhe prokurorët vendorë dhe nuk pret që ata të bëjnë gjykim të drejtë.
Në dosjen e prokurorit Ceccarelli, përmendet se si ish-gjykatësi Faik Hoxha ishte korruptuar nga grupi i Azem Sylës për të mbyllur hetimet ndaj tyre.
Në dosje thuhet se Hoxha kishte marrë 20 mijë euro ryshfet, për të mbyllur rastin duke mos e hetuar Nuhi Ukën gjatë kohës sa ishte kryetar i Gjykatës Komunale në Prishtinë.
Kujtojmë se grupi i Azem Sylës dyshohet se kishte arritur që ndikimin e vet me anë të ryshfetit, kërcënimeve e frikësimit, ta shtrijë në Agjencinë Kosovarë të Privatizimit, në Gjykatën Komunale të Prishtinës, në polici, dhe në Prokurori.
Azem Syla dhe 21 persona të tjerë akuzohen për krim të organizuar në lidhje me tjetërsimin e tokave me pronësi shoqërore në Veternik e Llapnasellë, afër Prishtinës.
Heqja dorë ndaj këtij rasti por edhe para ca disa nga rasti i njohur si “Vizat”, ku të akuzuar janë Ukë Rugova, djali i ish-presidentit Ibrahim Rugova me ish-ministrin e Kulturës, Astrit Haraqija dhe 18 të tjerë të akuzuar për krim të organizuar, tregon qartë se edhe EULEX-i dështoi të çojë prapa grilave të ashtuquajturit “peshqit e mëdhenj”. /tesheshi.com/
