Shqipëria nuk ka pësuar asnjë ndryshim pozitiv apo negativ, sipas studimit të vitit 2017 mbi brishtësinë e shteteve.
E renditur në vendin e 124, nga 178 shtete të marra në shqyrtim, sikurse edhe në vitin 2016, vendi ynë qëndron në një zonë “neutrale”, larg listës së shteteve në rrezik të lartë, apo atyre me brishtësi të ulët.
Befason këtë vit Italia. Fqinji ynë përtej Adriatikut bën pjesë zyrtarisht në listën e shteteve që kanë shënuar rritje të shkallës së brishtësisë së tyre. Raporti, i përpiluar nga Fondi për Paqe, e argumenton këtë me kombinimin e tërmeteve të rëndësishme, presioni i vazhdueshëm nga lëvizjet e refugjatëve dhe në veçanti, tensionet rreth referendumit të dështuar kushtetues dhe dorëheqjes së kryeministrit Matteo Renzi, shkruan Monitor.
Në zonën e “minuar” vijojnë të mbeten shtete afrikane si Sudani, Afrika Qendrore, Kongo, apo edhe Afganistani, Iraku, Siria. Finlanda vijon të kryesojë listën si vendi më pak i brishtë, ndjekur nga të tjera shtete si Norvegjia, Gjermania, Austria, Kanada etj.
Po t’i hedhim një sy rajonit, Serbia ka treguar përmirësim të dukshëm të pozicionit të saj, duke u ngjitur me 2 shkallë nga viti i shkuar dhe duke u renditur e 107-ta në listë. Bosnja dhe Hercegovina mbetet më e brishta e rajonit, e cila renditet e 93, ndërsa Maqedonia e 112 dhe Mali i Zi i 130-ti. (renditja është në shkallë zbritëse përmirësuese, pozicioni i parë është më i brishti, i fundit 178 më pak i brishti).
Etiopia, Meksika dhe Turqia regjistruan përkeqësimin më të madh gjatë vitit 2016. Një numër i vendeve të zhvilluara gjithashtu shënuan rezultate të përkeqësuara për treguesit e caktuar, veçanërisht Shtetet e Bashkuara dhe Mbretëria e Bashkuar, të cilat përjetuan fushata politike shumë të ndara gjatë vitit 2016.
Trendet afatgjata të FSI kanë ngritur gjithashtu “flamuj të kuq” në një numër vendesh – në veçanti Afrikën e Jugut dhe Senegalin – për të cilat kushtet që mund të shkaktojnë paqëndrueshmëri, janë përkeqësuar ndjeshëm
Indeksi i shteteve të Brishta, përpiluar nga Fondi për Paqe, nxjerr përfundime duke u bazuar në disa tregues, si më poshtë: Presionet Demografike, Niveli i refugjatëve, Zhvillimi ekonomik, Tensione dhe dhunë, Të drejtat e njeriut, Varfëria, Forcimi i shtetit, Shërbimet publike dhe Funksionimi i ligjit./tesheshi.com/
