Mensur Krasniqi
Hulumtimi i Avokatit të Popullit i realizuar në 17 qendra për punë sociale në vend tregon se 236 fëmijë janë në rrugë.
Krahasuar me vitin 2011 ka ulje të numrit të fëmijëve, por raporti flet se në 6 qytete është shtuar numri i fëmijëve në rrugë. Fëmijët më të vogël në rrugë kanë vetëm disa muaj, ndërsa më të mëdhenjtë kanë nga 18 vjet. Nga 236 fëmijë, 114 janë të gjinisë mashkullore dhe 122 femërorë. Për nga përkatësia etnike, pjesa më e madh i përkasin kombësisë rome, ose 228, pesë turq, dy maqedonas dhe një egjiptian. Më së shumti fëmijë në rrugë ka në Shkup (113) më pas në Manastir, Kumanovë, Veles, Gostivar dhe Kërçovë. Më pak se 10 fëmijë në rrugë ka në Resnje, Gjevgjeli, Vinicë, Strumicë, Kavadar, Shtip, Negotinë dhe Prilep.
Të dhënat e Avokatit të Popullit tregojnë së fëmijët në rrugë në për qindje më të madhe i përkasin familjeve që jetojnë në kushte të rënda sociale dhe të paarsimuar, familje që shfrytëzojnë ndihma sociale.
“Fatkeqësisht, kur flasim për fëmijët në rrugë, realiteti në shoqërinë tonë është i keq nga arsyeja që këta fëmijë me vite I shohim në rrugë, vet ose në shoqërinë e më të rriturve lypin. Ose pastrojnë pasqyret e automjeteve. Shumë shpesh ndodh që ti njohim tashmë të njëjtit fëmijë, në të njëjtin vend dhe në të njëjtën kohë. Këtë të dhënë e konfirmon edhe hulumtimi i Avokatit të popullit në vitin 2011 dhe këtë vit”, tha Ixhet Mehmeti, Avokat i popullit.
Sipas ambasadorit Aivo Orav, BE gjithnjë ka ofruar dhe vazhdon të ofron instrumente për realizimin e të drejtave të fëmijëve.
“Është koha për qasje më inovative të cilat mund të shndërrojnë jetët e fëmijëve. Në këtë vend po shohim ulje të vdekjes së foshnjave dhe përmirësimin e përqindjes së fëmijëve të regjistruar në shkollë, por ka ende të ngelet për të punuar për fëmijët, posaçërisht për fëmijët në rrugë”, ka theksuar ambasadori Orav, duke shtuar se BE do të vazhdoj me përkrahjen për realizimin e të drejtave të fëmijëve.
Me të dhënat e Avokatit të Popullit mbi numrin e fëmijëve në rrugë nuk pajtohen nga Ambasada e parë për fëmijë në botë “Megjashi”. Ata për tesheshi.com shprehen të kënaqur që institucionet përkatëse tashmë kanë filluar të evidentojnë fëmijët në rrugë, mirëpo asessi nuk e pranojnë si të saktë këtë evidencë, meqë sipas tyre ky numër është dukshëm më i madh nga ajo që e pasqyrojnë këto të dhëna.
“Ambasada e parë për fëmijë në botë Megjashi, nuk ka të dhëna statistikore si rezultat i hulumtimeve për numrin e saktë të fëmijëve në rrugë. Mendojmë që numri i tyre është më i madh. Mirëpo fillimi i evidentimit të fëmijëve në rrugë, të drejtat e të cilëve cdo ditë po shkilen dhe shkatërohen është dicka pozitive. Kjo mund të shkon në përmirësimin e kushteve të fëmijëve, përkujdesje të tyre, pajisje me certifikata nëse nuk kanë, realizimin e të drejtave shëndetësore, regjistrimi në shkollë etj. Duhet edhe hapja e programeve që iu dedikohen këtyre fëmijëve me qëllim që më lehtë të integrohen në shoqëri dhe t’ iu lehtësohet procesi i socializimit”, deklaroi Jana Zengovska, përfaqësuese e Ambasadës së parë për fëmijë në botë “Megjashi”.
Nga “Megjashi “ shtojnë se duhet me cdo kusht të ulet ky numër i fëmijëve në rrugë, dhe kjo do bëhet nëse ulet niveli i varfërisë, punësimi i njërit nga prindërit të fëmijëve, të zhvillohet procesi arsimor, mbikëqyrja e organeve kompetente ndaj prindërve që keqpërdorin fëmijët e tyre për të siguruar kafshatën e bukës etj. /tesheshi.com/
