Në prag të zgjedhjeve të 21 qershorit, Kryeministri Edi Rama dhe Kryetari i Kuvendit Ilir Meta u kanë bërë thirrje të gjithë qytetarëve të votojnë të lirë, pasi në këto zgjedhje, siç tha Kryeministri, vuloset reforma administrative.
Kreu i PS-së deklaroi se rritja e cilësisë së zgjedhjeve është sfida e tyre, në mënyrë që 21 qershori të jetë një ditë tjetër e demokracisë.
“Duam të jenë zgjedhjet më të qeta dhe më të pandikuara. Në gjithë këtë fushatë nuk ka ndodhur në asnjë rast që takimet e kryetarit të Kuvendit apo Kryeministrit të bëhen arsye për të marrë në rresht nxënës e mësues që të mbushin sheshin e të duartrokasin me pahir”,- tha Rama.
Ai u shpreh më tej se administrata e shtetit në asnjë rast nuk është vendosur në rresht nga drejtoritë e burimeve njerëzore, siç ndodhte në fushatën e shkuar dhe se ushtria shqiptare nuk është përfshirë në asnjë veprimtari të asnjë natyre që kemi parë në zgjedhjet e shkuara, e veçanërisht në ato të vitit 2013.
Sipas kryeministrit, për herë të parë buxheti i shtetit nuk u bë pjesë e nuk u prek prej shpenzimeve elektorale. Kreu i ekzekutivit deklaroi se shteti në këtë fushatë ka qenë tërësisht i ndarë nga qëllimet e ASHE si koalicion dhe ambicia e tyre për të fituar zgjedhjet.
“Fëmijët nuk po përdoren në fushatë në takimet elektorale. Ka thjesht një zgjedhje të natyrshme të fëmijëve që marrin pjesë në takimet elektorale. Është e pashmangshme pasi kur prindërit vijnë në takime me dëshirën e tyre marrin edhe fëmijët me vete, ne nuk mund të rrethojmë vendet ku bëjmë takimet me popullin. Kjo nuk ka lidhje me përdorimin politik të fëmijëve, çka mund ta them edhe për palën tjetër”,- tha Rama.
Ai shtoi se pretendimet e PD-së për mosmbarëvajtjen e fushatës, pjesa më e madhe janë tërësisht artificiale dhe përpjekje për të rritur tension që nuk gjen vend. Sipas Ramës, kjo është fushata më e qetë që kemi zhvilluar ndonjëherë.
“Pretendimi i PD që ne e kemi konsideruar të drejtë ka qenë përfshirja e kandidatit tonë në dhënien e tapive gjatë fushatës elektorale. Kemi marrë masa të menjëhershme për këtë. Sa i takon incidentit të Ersekës, është rast që është ndjekur me vëmendjen dhe kujdesin maksimal nga policia e shtetit. Sa i takon blerjes së votave, kemi vetëm një konstatim konkret dhe bëhet fjalë për përpjekjen për të blerë vota nga Kryetari i Bashkisë së Vorës dhe ku është i vetmi rast e po ndiqet nga organet kompetente. Për çdo rast jemi të gatshëm të veprojmë siç kemi vepruar në atë rast”,- tha Rama.
Ai u bëri thirrje qytetarëve të votojnë në 21 qershor, të votojnë të lirë, alternativën, kandidatin që ata dëshirojnë, por të votojnë. Ndër të tjera Kryeministri theksoi se në 21 qershor kemi zgjedhje që kanë të bëjnë me vulosjen e reformës administrative.
Nga ana e tij, Kryetari i Kuvendit dhe njëherësh kreu i LSI-së, Ilir Meta, e cilësoi këtë si një fushatë të qetë dhe të kulturuar, siç i takon një vendi Europian.
“Pjesëmarrja është e domosdoshme për tu bërë pjesë në këtë moment historik. Të gjithë duhet të marrin pjesë në votime, të lirë dhe të pandikuar nga çdo formë presioni apo shantazhi. Është e nevojshme që të gjithë komisionerët të garantojnë një proces normal, të evidentojnë çdo lloj problemi përpara dhe gjatë procesit”,- tha Meta.
Ai shtoi se çdo qytetar shqiptar duhet të denoncojë çdo formë deformimi për përpjekje për blerje të votës. Për Metën, secili duhet të shprehë bindjen e tij dhe duhet garantuar rendi e qetësia.
“Për ne është e rëndësishme mbrojtja dhe jo deformimi i votës. Ne e dimë se sa e rëndësishme është edhe një votë në procesin e demokracisë, e aq më tepër në këto zgjedhje vendore”,- u shpreh z. Meta./tesheshi.com/
