Kryeministri Rama rimorri për trajtim çështjen e premtimit të PD-së për ulje kontributesh në sigurimet shoqërore dhe rritje pensionesh, duke thënë se është një arithmetikë e pamundur.
“Këtë e ka programi i PD-së, që përkthyer në gjuhën e ‘Mrizit të Zanava’ do të thotë, do të ulim prodhimin e qumështit dhe do të rrisim prodhimin e djathit, pastaj do të ishte fabrikë sapuni.
Si mund të ulësh sigurimet shoqërore dhe të rritësh pensionet?
Idealja është çka shoqëria paguan sot, për të paguar pensionet të mos jetë në hendek për të mbushur një hendek që është më i madh se sa paguajnë njerëzit sot për të marrë pensionet nesër. Ne kemi bërë reformën e pensioneve, një kategori është ajo që dilte (në pension) para se në të bënin reformën, ndaj, nëse shikoni një mësues para reformës, e ka pensionin më të ulët se ai që ka dalë pas reformës”, argumentoi Rama gjatë një bashkëbisedimi publik në Lezhë.
“Të thuash të ul sigurimet dhe të rris pensionet dhe do të thotë që të marrësh para nga taksat dhe do të ulesh investime dhe do ti lesh pa pension pastaj. Të financosh pension, pa u bazuar tek sigurimet do të thotë të bësh Sude. Zbraz këtu për të mbushur atje, vjen një moment kur atje shtohet nevoja, dhe pastaj nuk ke më”, tha Rama, duke shprehur bindjen e një mandati të tretë.
“Jemi në qeveri, do të rrimë në qeveri”, theksoi ai. /tesheshi.com/
