Kreu i qeverisë, Edi Rama, ka deklaruar ditën e sotme se Shqipëria do të bëjë një hap përpara në rrugën e saj drejt integrimit europian nëpërmjet miratimit të reformës në drejtësi.
Duke folur sot në një aktivitet të mbajtur për luftën kundër terrorizmit, kryeministri u shpreh se rruga e integrimit dhe mënyra për t’u bërë anëtar i Bashkimit Europian është e mërzitshme për shkak të 35 kapitujve që vendet kandidate duhet të negociojnë.
“Puna nuk fillon me kapitullin e parë, por si rregull, nga kapitulli 23 dhe 24. Në thelb këta kapituj lidhen me drejtësinë, sistemin gjyqësor, me ligjin dhe sigurinë. Edhe pse Shqipëria nuk e ka nisur ende hapjen e kapitullit, ajo ka nisur punën nëpërmjet reformës në drejtësi, e cila është në përfundim e sipër. Nëpërmjet këtij procesi Shipëria do të bëjë një hap përpara edhe më përpara se vendet që kanë hapur negociatat pa reformuar sistemin e tyre të drejtësisë”, – tha kreu i qeverisë.
Duke folur për luftën kundër terrorizmit, ai deklaroi se nuk mund të ketë siguri unilaterale apo thjeshtë kombëtare. Rama pranoi problemet në Shqipëri, ndërsa tha se edhe sot strukturat tona tradicionale vijojnë të veprojnë sikur në botë të mos ketë komunikim masiv dhe të shpejtë.
“Kjo është arsyeja që ne duhet të përkthejmë në gjuhën e shekullit tonë parametrat bazë të marrëveshjeve ndërkombëtare”, – u shpreh ndër të tjera në fjalën e tij Kryeministri Edi Rama. /tesheshi.com/
