Nëntë herë fituesi i French Open-it, Grand Slam-it që zhvillohet në Paris, ka lajmëruar pikëllueshëm pasdite në një konferencë shtypi se nuk mund të vazhdojë më.
Rafael Nadal, tenisti më i padiskutueshëm në fushat me dhé të kuq, e ka pranuar se kjo mund të ishte konferenca e shtypit më e vështirë në karrierën e tij.
29-vjeçari do të pohonte se kishte patur një problem me kyçin e dorës që zgjaste prej javësh, por pati mbyllur sytë para dëshirës për të luajtur e për t’u bërë i pari tenist që fiton dhjetë tituj në një Grand Slam.
“E di se nuk mund ta përfundoj turneun. Eshtë pjesë e jetës, dhe shpresoj të kthehem për shumë vite përsëri në Roland Garros,” u shpreh pak më parë Nadal i pezmatuar.
“Nëntë herë në karrierën time kam qenë në gjendje të jem shëndoshë këtu në Paris e ta fitoj këtë turne,” ka shtuar ai.
Nadal kishte arritur në raundin e tretë të turneut, pas një fitore të thellë, 3-0, të enjten ndaj argjentinasit Facundo Bagnis. Kjo ishte fitorja e 200-të për të në Grand Slam-e. Ai do të kishte përballë të shtunën bashkëkombasin Marcel Granollers.
Ky dëmtim është i fundit në një varg lëndimesh që e kanë lënë Nadal-in jashtë fushës së tenisit në shumë turne, posaçërisht vitin e shkuar. /tesheshi.com/
