PSG e ka kthyer në ndeshje tenisi përballjen me Bordonë, duke fituar me rezultatin 6-2, në takimin e rradhës për Ligën 1 në Francë.
Ndeshja ka shkuar në mënyrën më të mirë të mundshme për kryeqytetasit, pasi ndaj Bordosë që mbante vendin e tretë, shënuan të 3 sulmuesit “e ëndrave”, Nejmar dy gola dhe Kavani e Mbape nga një.
Draksler e Munir, plotësuan golat e tjerë të ndeshjes. Me kuriozitet të vecantë pritur nga të gjithë, momenti kur PSG fitoi një penallti. Topin e mori Nejmar, i cili e dërgoi në rrjetë, duke bërë një “dedikim” për Kavanin, si për t’i hedhur “ujin e shuarjes”, polemikës së krijuar mes dy shokëve të skuadrës.
Në këtë mënyrë PSG shkatërron një tjetër rival të mundshëm, e ndoshta “e ka vrarë” që tani kampionatin francez. Por me Nejmar, Kavanin e Mbape, e sigurtë është që argëtimi nuk do të mungojë, e ndoshta edhe polemika do të bëhet pjesë e konkurencës…me veten. /tesheshi.com/
