Kryeministri i Kosovës, Albin Kurti, beson se ekziston mundësia e konflikteve eventuale me Serbinë.
Kosova online raporton se ai ka deklaruar se ka katër arsye pse kjo mund të ndodhë, e njëra prej tyre është se Serbia nuk e njeh pavarësinë e Kosovës.
Kurti ka theksuar për gazetën zvicerane Republik se Kosova nuk ka frikë nga “veprimet e Serbisë”, por është në roje, transmeton Reporters. Një arsye tjetër për konfliktin eventual, sipas Kurtit, është se Serbia bllokon pranimin e Kosovës në organizatat ndërkombëtare dhe financon “strukturat paralele” në veri të Kosovës.
“Serbia lufton kundër njohjeve tona ndërkombëtare dhe në të njëjtën kohë financon strukturat ilegale brenda Kosovës që minojnë sundimin e ligjit dhe sovranitetin tonë. Së dyti, Serbia nuk i njeh krimet e luftës të kryera në vitin 1990”, theksoi Kurti.
Kryeministri i Kosovës deklaroi se Serbia mban marrëdhënie të ngushta me Rusinë, gjë që siç tha ai prish paqen në rajon.
“Kosova është demokraci, Serbia jo, kjo është gjëja e tretë që më shqetëson. Kushdo që kufizohet me autokracinë është në rrezik. Së katërti, Beogradi zyrtar mban lidhje të ngushta me presidentin despotik rus Vladimir Putin. Vuçiç u takua me Putinin pothuajse 20 herë në 10 vjet, takimi i fundit ishte më 25 nëntor 2021 në Soçi, tre muaj para fillimit të luftës”, tha Kurti. /tesheshi.com/
