Nga Blendi Gashi
Kryeministri Haradinaj gjatë një vizite që i bëri të hënën policisë premtoi se është dakordësuar me drejtorin Shpend Maxhuni që të punojnë më së shumti në luftimin e drogës, konkretisht të marrin masa që fëmijët të jenë larg narkotikëve.
“Zhvilluam një bisedë pune me drejtorin e përgjithshëm, Shpend Maxhuni, diskutuam edhe për disa detyra më urgjente që kemi, siç është droga tek fëmijët, mundësia që trafikantë të ndryshëm të shpërndajnë drogë te fëmijët e moshës minore, kjo është e patolerueshme dhe nuk do të tolerohet”, tha ai.
Luftimi i kësaj dukurie shqetësuese vërtet duhet përshëndetur, por mbetet për t’u parë nëse vërtet do të punohet në këtë drejtim me përkushtim më të madh në mënyrë që fëmijët të jenë sa më larg narkotikëve.
Megjithatë kur jemi te droga, Haradinaj nuk foli për një çështje tejet të ndjeshme, që lidhet pikërisht me të, pra për supervjedhjen në Dhomën e Dëshmive në Prishtinë ku mes 24 e 25 prillit të vitit 2009 u vodh një sasi prej 50 kilogramëve drogë e llojit heroinë dhe qindra mijëra euro në valuta të ndryshme.
Haradinaj po ashtu nuk e tha asnjë fjalë të vetme edhe për vjedhjen tjetër në Dhomën e Dëshmive këtë herë në qytetin e Pejës ku më 2012 u vodhën 25.3 kilogramë flori.
Edhe pas disa vitesh, asnjëri rast nuk është zbuluar dhe vështirë se mund të zbardhen, pasi mediat kosovare kanë raportuar se në dosje mungojnë elementet kryesore që rregullisht merren në momentin e parë kur ndodh ngjarja.
Kjo heshtje e Haradinajt për dy superskandalet në fjalë është një sinjal i qartë se as në qeverinë e tij ato nuk pritet të zgjidhen dhe përgjegjësit nuk do vihen para drejtësisë, ashtu siç ndodhi edhe gjatë dy mandateve të Thaçit dhe një të Mustafës.
Për rastet në fjalë nuk foli as ministri i ri i Punëve të Brendshme Flamur Sefaj i cili ishte shoqëroi Haradinajn në vizitën në polici.
Megjithatë mbetet të shihet nëse Haradinaj apo Sefaj do kenë ndonjë përgjigje kur do pyetën në të ardhmen për çështjen në fjalë.
Ja ç’thanë ish-ministrat e Brendshëm për skandalet në fjalë…
Ndërsa për rastet në fjalë ish-ministri i Brendshëm në qeverinë “Mustafa”, Skender Hyseni u deklarua në tetor të vitit 2016 në Kuvendin e Kosovës kur u pyet nga deputeti i Vetëvendosje-s Rexhep Selimi.
Për rastin e vjedhjes së dëshmive në një dhomë të sigurisë së lartë në Prishtinë, Hyseni tha se kjo çështje është e vjetër, apo thënë ndryshe është parashkruar.
Kurse për vjedhjen në policinë e Pejës, ai deklaroi se ka kaluar në kompetencë të misionit të sundimit të ligjit EULEX dhe se janë paraqitur prova të reja.
“Sa i përket vjedhjes në Dhomën e Dëshmive në Pejë, Inspektoriati Policor, ka ndërmarrë veprime dhe është ngritur kallëzim penal. Lidhur me këtë rast janë paraqitur prova të reja dhe rasti është në progres”, ka thënë Hyseni.
Kurse ish- ministri i Punëve të Brendshme, Zenun Pajaziti, i cili drejtonte këtë dikaster të rëndësishëm në vitin kur ndodhi vjedhja në policinë në Prishtinë ka thënë për portalin tesheshi.com se që nga ajo kohë kur ka ndodhur ngjarja asnjë angazhim i tij nuk ka qenë i lidhur me sferën e sigurisë.
“Siç e dini në atë kohë tranzitore ka pasur përgjegjësi EULEX-i dhe drejtuesit e policisë. Ndoshta, kjo pyetje më shumë se mua është mire t’i adresohet njerëzve aktual që merren me këtë sektor, ministrit aktual të Brendshëm, drejtorit të policisë që ka qenë drejtues i shtyllës përgjegjëse në atë kohë dhe pse jo edhe presidentes së vendit e cila ka qenë pjesë e menaxhimit të policisë në atë kohë”, deklaroi atë kohë Pajaziti. /tesheshi.com/
