Për herë të parë gjatë një fjalimi publik, Edi Rama ka shfaqur shenja vokale ngjirjeje. Kreu i mazhorancës mbajti një fjalim në atë që mund të quhet tubim anti-çadër, duke u rikthyer në sheshin “Skënderbej” si triumfator pas rikonstruksionit të tij nga bejnamini Veliaj. Ishte kjo në një farë mënyrë dhe hapja e fushatës elektorale jo-zyrtare për 18 qershorin, të cilin e konsideroi të pashmangshëm si ballafaqim me votuesit.
Tubimi, ui kushtohej atyre që votojnë për herë të parë, ndërkohë që narrativa dominuese e folësve ka qenë kundër aksionit politik të opozitës me anë të një çadre në bulevard, që si zakonisht është përkthyer si aksion anti-Vetting.
“Kur keni lindur ju, Tirana nuk kishte gjelbërim. Ata që janë aty në çadër, kishin mbjellë gjithë parqet me çadra dhe i quanin zhvillim. Kishin prerë pemët dhe kishin shkatërruar financat e prindërve tuaj duke i marrë dhe çuar gjithë në çadrat e Xhaferrit, Sudes dhe Saliut.
Kishin pushtuar të gjithë hapësirat dhe thoshin kjo është “tokë e xanun”. Na u desh të shkulnim të gjithë ato çadra, që ua lanë vendin pemëve që u mbollën dhe hapësirën. Tani duan t’i zënë Shqipërisë rrugën”, tha Rama.
Ndërkohë, ai ka bërë një portret rivalit të tij Basha, duke i renditur të gjitha postet që ka mbajtur ndër vite, sipas Ramës të gjitha të dhuruara e asnjë të fituar. Këtu ai përfshiu dhe Bashën si ish-kryetar bashkie, kur tha se atë post ia dhuroi tjetërkush.
Rama pranoi shumë probleme që ka ende Shqipëria, ku tha se dhe korrupsioni ishte ende prezent në administrate – por ku nuk përmendi përhapjen e kanabisit – dhe tha nga ana tjetër se reformat dhe përpjekjet për të bërë shtet, ishin të pamendueshme pak vite më parë. /tesheshi.com/
