Në përvjetorin e katërmbëdhjetë të hapjes së burgut të Guantanamos, para Shtëpisë së Bardhë në Uashington është protestuar me kërkesën për mbylljen e tij.
Protestuesit u mblodhën një ditë pasi administrata amerikane u zotua edhe një herë se do ta mbyllë atë para mbarimit të mandatit të presidentit Obama.
Aktualisht në Guantanamo ka 103 të burgosur. Nëntë të tillë kanë vdekur që kur burgu u hap në janarin e vitit 2002.
Obama do të zotohej gjatë fushatës elektorale presidenciale të 2008-ës se do ta mbyllte burgun e Guantanamos, por ai vijon të mbetet ende i hapur.
Shefi i stafit të presidentit amerikan, Denis McDonough, do t’i deklaronte një televizioni informativ të hënën se Obama ishte i vendosur ta mbyllte qendrën e ndalimit para mbarimit të presidencës së tij. “Ai ndjen një detyrim ndaj presidentit të ardhshëm. Ai do ta rregullojë këtë, kështu që ata nuk kanë për t’u përballur me të njëjtin varg sfidash,” ishin fjalët e tij. /tesheshi.com/
