Pas deklarimit të prokurorit Elez Blakaj se ka ikur drejt SHBA-së pasi është kërcënuar për rastin e veteranëve ku implikon edhe kryeprokurorin Aleksandër Lumezi, shoqëria civile sot nga ora 18:00 do të protestoj në Prishtinë , me kërkesën për dorëheqjen e tij.
“Shkarkim Prokurorit – Veting Gjyqësorit”, është motoja e protestës, e cila pritet të mbahet në Sheshin “Zahir Pajaziti”, siç thuhet nga organizatorët kundër ndërhyrjes së politikës në sistemin e drejtësisë.
Përmes njoftimit për media, thuhet se “tashmë është e qartë se prokuroria është në shërbim të politikës”.
“Edhe po të ketë prokuror/e si Elez Blakaj që ka vullnet për ta luftuar korrupsionin, do të pengohet nga Kryeprokurori Aleksander Lumezi dhe Kryeministri Ramush Haradinaj. Qytetari i Republikës në rrethana të tilla duhet të jetë në krye të përgjegjësive dhe detyrave të veta qytetare. Sot, detyrë është kërkesa për shkarkimin e Kryeprokurorit Lumezi dhe fillimin e procesit të vetingut për gjyqësorin e vendit tonë”, thuhet në njoftim.
Kujtojmë se prokurori Elezaj ka thënë se kryeprokurori Lumezi e ka qortuar pse e ka thirrur si dëshmitarë në rastin e veteranëve kryekuvendarin Veseli. /tesheshi.com/
