Palestinezët dolën dje në rrugë në përkujtim të 67-vjetorit të “Nakba”-së, apo, ndryshe, “Katastrofës”, me çka nënkuptojnë themelimin e shtetit izraelit më 1948 dhe shkatërrimin e mëpastajmë të dhunshëm nga sionistët të shoqërisë palestineze.
Një pjesë e protestave ishin paqësore, por ca prej tyre përfunduan në përleshje me forcat izraelite të sigurisë.
Si rezultat i përleshjeve pati dhjetëra të plagosur.
Ushtarët izraelitë përdorën plumbat e gomës, gazin lotsjellës dhe ujin me presion për shpërndarjen e protestuesve në Bregun Perëndimor, dhe lënduan 17 persona.
21 palestinezë u qëlluan në këmbë gjatë përplasjeve në qytetin e Nablusit.
Një protestë të madhe në përkujtim të “Nakba”-së pati dhe në fshatin Nilin, ndërsa forcat izraelite e deklaruan hapësirën një “zonë të mbyllur ushtarake”.
Në një fjalim të mbajtur të premten në Bregun Perëndimor, presidenti palestinez, Mahmud Abbas, deklaroi se nuk mund të arrihet paqe me Izraelin teksa ai vazhdon të pushtojë tokën palestineze. “Populli palestinez nuk do të herë dorrë kurrë nga toka apo nga të drejtat e tij. Ajo që ngjau më 1948 nuk do të ndodhë kurrë më”, deklaroi udhëheqësi palestinez.
Palestinezët e nxjerrë me forcë nga shtëpitë e tyre në 1948-n shpresojnë ende të kthehen, dhe e drejta e rikthimit të tyre është parakusht për çdo marrëveshje paqeje me Izraelin.
Ndërkohë që palestinezët protestuan anembanë territoreve të pushtuara, në Izrael pati vetëm një manifestim në përkujtim të “Nakba”-së. Organizatorët dhe mbështetësit e aksioneve të tilla janë përballur rëndom me kërcënime të aspektit shoqëror, politik dhe financiar.
Pak ditë pas betimit të qeverisë së re të Netanyahu-t, më e djathta në historinë e Izraelit, paqja nuk duket ende në horizont. /tesheshi.com/
