Nga Blendi Gashi
Loja me numrin e pjesëmarrësve në protestën e organizuar nga partitë opozitare VV, AAK, NISMA, e të mbajtur dje në Prishtinë, ka qenë një element që çoi pluhur dhe përplasi me fjalë pushtetin dhe opozitën.
Policia e Kosovës deklaroi pas përfundimit të protestës përmes zëdhënësit të saj Baki Kelani, në një konferencë për mediat, se, “numri i protestuesve vlerësohet të ketë qenë afërsisht rreth tetë mijë (8.000) pjesëmarrës”.
Por një numër shumë herë më të madh dha opozita e bashkuar, e cila përmes një kumtese të lëshuar
deklaroi se në protestën e tyre morën pjesë rreth 100 mijë qytetarë.
“Sot (dje) qytetarët ia dhanë përgjigjen qeverisë Mustafa, duke dalë në protestën më të madhe të zhvilluar në Kosovë që prej pasluftës. Rreth 100.000 pjesëmarrës i kanë mbushur rrugët dhe sheshet e Prishtinës, të ardhur nga gjithë qytetet e fshatrat e Kosovës, si dhe nga vise të tjera nga trojet shqiptare dhe nga diaspora,” thuhej në këtë komunikatë të opozitës.
Ndërsa Këshilli për Mbrojtjen dhe të Drejtat e Lirive të Njeriut (KMDLNJ), që e ka monitoruar këtë protestë, ka thënë se në të kanë marrë pjesë 30 deri në 35 mijë protestues.
Ama ende nuk dihet se sa ka qenë saktë numri i pjesëmarrësve.
Portali mbarëkombëtar tesheshi.com ka marrë mendimin e ekspertëve të çështjeve të sigurisë për deklaratën e policisë. Ata e vlerësojnë atë të pamatur dhe qesharake, duke thënë se policia duhet të dalë sa më shpejt me shifrën reale të qytetarëve që kanë marrë pjesë në protestë.
Burim Ramadani, ekspert i sigurisë, në një prononcim për tesheshi.com e quan jo vetëm një vlerësim të pasaktë të policisë, por edhe dëmtues për besimin e qytetarëve te policia.
“Sjellja e policisë sot në përgjithësi ishte profesionale, por një vlerësim i tillë për numrin e pjesëmarrësve ka qenë një gabim i madh profesional. Asnjëherë, dhe në asnjë rrethanë, policia e Kosovës nuk duhet ta vendosë veten qëllimisht në një institucion të pabesueshëm për qytetarët. Sepse policia nuk mund të ketë efikasitet pa bashkëpunimin me qytetarët. Dhe ky lloj vlerësimi i sotëm ka shkaktuar këtē dëm, pra, se kushdo që ka parë pamjet e protestës nuk ka sesi t’i besojë profesionalizmit të policisë. Mendoj se policia urgjentisht duhet të dalë publikisht me shifrën reale të pjesëmarrësve në protestë, për ta rikthyer besimin qytetar,” ka thënë Ramadani.
Njohësi i çështjeve të sigurisë Avni Islami e quan qesharake deklaratën e policisë rreth numrit të
qytetarëve që morën pjesë në protestën e partive opozitare.
“Policia gabon shumë te numri i protestuesve, kur thotë se përafërsisht ishin 8.000 veta. Kjo është qesharake dhe joserioze, sepse vetëm në stadiumin e Prishtinës mund të vendosen jo ulur mbi 30.000 mijë veta. Duhet kuptuar se çdo polici i minimizon këto gjera, por jo si kjo, duke e kthyer në humor,” ka deklaruar Islami për tesheshi.com.
Sekretari i partisë NISMA për Kosovën, Bilal Sherifi, thotë se përveç atyre që janë të dirigjuar nga qeveria e Kosovës, të gjithë janë dakord se numri i atyre që protestuan ishte shumë i madh.
“Në të ardhmen ky numër do të jetë edhe më i madh nëse qeveria që ka shkelur rëndë Kushtetutën e Kosovës në interes të armiqve të saj nuk merr përgjegjësitë që i takojnë dhe të japë dorëheqje. Koha është tani. Të gjitha rrugët çojnë te Sovrani,” ka shkruar Sherifi në facebook.
Kurse, Avni Arifi, këshilltari i kreut të AAK-së, Ramush Haradinajt, përmes një postimi të bërë po në facebook ka thënë se vlerësimi i policisë është sakrifikim i dhimbshëm i profesionalizmit të policisë për interesa të partive LDK-PDK.
“Kush se ka kuptuar ende, kjo është kapja e shtetit,” ka shkruar ai. /tesheshi.com/
