Kurdistani në Irakun e Veriut po zhvillon sot referendumin për shpalljen e pavarësisë së zonës së banuar nga kurdët etnike prej territorit të Irakut.
Referendumi ka shkaktuar reagimin e të paktën 4 shteteve, Irakut, Iranit, Turqisë dhe Sirisë, të cilat gjatë ditës së sotme kanë paralajmëruar vendosje sanksionesh, deri edhe në ndërhyrje ushtarake kur rajonit, që po synon krijimin e shtetit të pavarur kurd.
Në të 4 shtetet jetojnë një numër mjaft i madh kurdësh, çka duket se është arsyeja kryesore sepse kundërshtohet referendumi.
Shpallja e pavarësisë së Irakut të Veriut nga Bagdati zyrtar duket se do të jetë sfida më e madhe e kurdëve.
Zona e cila po zhvillon referendumin sot, është shpallur territor autonom dhe njihej nga qeveria e Irakut prej vitesh, por ata nuk janë mjaftuar me kaq dhe duan të shpallin pavarësinë.
Por situata nuk është kaq e thjeshtë. Iraku i Veriut cilësohet si Kurdistani Jugor nga nacionalistët kurd, ndërkohë që territore të mëdha të banuara nga kurdët gjenden në Turqinë jug-lindore, Sirinë e Veriut dhe Jug-Perëndim të Iranit.
Sigurisht që shteti i ri do të ishte “toka e premtuar” e të gjithë kurdëve të zonës.
Përtej kërcënimeve të hapura nga të trija shtetet dhe sidomos nga Turqia dhe Irani, presidenti i Irakut Verior, Mesud Barzani është shprehur se nuk do të tërhiqen nga kërkesa e tyre për pavarësi edhe sikur t’a dinin që në fund të rrugës i pret vdekja.
Po kush është Mesud Barzani?
Mesud Barzani ka lindur në viti 1946 në Mahabad, zonë kurde, në territorin e Iranit. Ai është djali i Mustafa Barzanit, një nacionalist i hershëm kurd, i cili ka mbajtur kontakte të ngushta me Britaninë e Madhe dhe SHBA-të.
Mesud ka tetë fëmijë, pesë djem dhe tre vajza.
Ai vishet gjithmonë me rroba ushtarake, madje edhe në takimet zyrtare të nivelit të lartë siç ishte ai me Presidentin e SHBA-ve, George Bush në vitin 2005.
Ai është Presidenti i Irakut të Veriut që prej vitit 2005, por për momentin i ka mbaruar mandati.
Barzani ka luftuar kundër ushtrisë së Sadam Husseinit gjatë luftës Iran-Irak me qëllim zgjerimin e territoreve të qeverisura prej kurdëve brenda Irakut.
Pas përfundimit të luftës, ushtria e Sadam Husseinit ndërmori një ofensivë “ndëshkuese” ndaj kurdëve që u radhitën me Iranin.
Ndërkohë që vijonte lufta për ndarjen e pushtetit brenda zonave të drejtuara prej kurdëve, Barzani i kërkoi ndihmë Sadam Husseinit për të luftuar rivalët e tij të Unionit Patriotik të Kurdistanit të udhëhequr nga Xhalal Talabani. Ushtria e Irakut zyrtar e ndihmoi dhe Talabani u arratis në Iran.
Familja e Barzanit ka qenë vazhdimisht pranë pushtetit si në kohën e babait të tij, ashtu edhe më pas. Madje ka mjaft akuza se të afërm të tij zotërojnë biznese miliarda dollarëshe në zonë.
Si Presidenti i Irakut të Veriut, Barzani është pritur në Shtëpinë e Bardhë nga Presidenti George Bush, Papa në Vatikan, nga Mbreti Saudit, kryeministri italian Berlusconi në Romë etj. /tesheshi.com/
