Ndër të akuzuarit në përfoljen e vrasjes ndaj deputetit Tom Doshi, është dhe Kreu i Prokurorisë së Krimeve të Rënda, Eugen Beci. Një ditë më parë, ai u shkarkua nga Kryeprokurori Llalla. Tek akuzat e deputetit Doshi, ai zë një vend të veçantë, pasi sipas këtij të fundit, ai ka qenë në një tavolinë me njerëzit që kanë ideuar atentatin ndaj, shoqëruar kjo dhe me një foto të postuar në FB.
Po kush është Eugen Beci?
Eugen Beci me një formim klasik në fushën e drejtësisë, e nisi karrierën e tij si gazetar në RTSH. Ai do të ushtrojë më pas profesionin e Prokurorit në Gjykatën e Krimeve të Rënda që në vitin e parë të themelimit të kësaj gjykate. Për 10 vite me rradhë ai ka qënë prokuror i disa çështjeve që në vitin 2005 kur edhe u themelua kjo gjykatë. Ai ka qënë në krye të hetimeve për çështje të rëndësishme si ajo e Dritan Dajtit dhe e Behar Kastratit. Pas një karriere të gjatë si prokuror pranë kësaj gjykate, Beci do të emërohet si drejtues në Prokurorinë e Krimeve të Rënda.
Në krye të kësaj prokurorie Beci do të mbajë dhe postin e drejtuesit gjatë hetimeve për një sërë çështjesh të bujshme si ato të Bandës së Tritolit, Arben Frrokut, çështjes së Lazaratit, grupit të Kokainës në Xibrakë , hetimeve për grupe të strukturuara kriminale në shpërthimet e fundit me tritol, vrasjeve me pagesë, grabitjeve dhe shumë çështjeve të tjera të hetuara nga Prokuroria e Krimeve të Rënda. Eugen Beci i ardhur në krye të Prokurorisë së Krimeve të Rënda vetëm dy muaj pas Kryeprokurorit të përgjithëm Adriatik Llalla, me miratimin e tij, u shkarkua nga e njëjta dorë, nga ai që e kishte emëruar në atë pozicion, pikërisht Kryeprokurori i Përgjithshëm.
Adriatik Llalla do të njoftojë më datë 4 mars 2015 shkarkimin nga detyra të Kryeprokurorit të Krimevë të Rënda Eugen Beci dhe emërimin e tij në Elbasan. Kjo me motivacionin se do të ketë një strukturim në organet hetimore. Llalla e ka quajtur një vit të suksesshëm 2014-ën e lënë pas , duke nënkuptuar një punë të mirë Eugen Becit të shkarkuar nga posti I drejtuesit të Prokurorisë për Krime të Rënda në Tiranë dhe të Emëruar në krye të Prokurorisë në rrethin gjyqësor të Elbasanit. /tesheshi.com/
