Ushtria e Kosovës do të jetë forcë model e standardeve të NATO-s, tha sot kryeminsitri Isa Mustafa, në manifestimin gjithëpopullor në kujtim dhe nderim të Epopesë së Ushtrisë Çlirimtare të Kosovës dhe heroizmit të Komandantit Legjendar Adem Jashari, Familjes Jashari dhe gjithë dëshmorëve të kombit, si dhe të gjithë të rënëve për lirinë dhe pavarësinë.
“Edhe sot shprehim mirënjohjen më të thellë për përkrahjen e vendeve demokratike, Shteteve të Bashkuara të Amerikës dhe të NATO-s, që në ditët më të vështira na dolën krah dhe së bashku me ne vulosën lirinë e Kosovës”, u shpreh ai. Kryeministri Mustafa tha se, 17 vjetori i rënies së Adem Jasharit dhe familjarëve të tij e gjenë Kosovën me shumë rritje. “Republika e Kosovës është njohur nga 108 shtete anëekënd globit, ka vendosur marrëdhëne të ngushta me shumë vende të botës, duke mundësuar subjektivitetin e saj ndërkombëtar dhe duke shënuar rezultate të prekshme në shumë fusha”, tha Mustafa. Ai vlerësoi se, transformimi i Ushtrisë Çlirimtare të Kosovës në Trupat Mbrojtëse të Kosovës dhe të kësaj në Forcat e Sigurisë së Ksovës është vetëm një nga rrëfimet e shumta të suksesesit të Kosovës për liri, pavarësi, të Kosovës sovrane dhe demokratike. “Procesi i avancimit të Fracave të Sisurisë së Kosovës do të vazhdojë edhe më tutje në themelimin e Forcave të Armatosura të Kosovës, të cilat do të jenë forcë moderne ushtarake, e pajisur me të gjitha cilësitë e nevojshme të një ushtrie të aftë për të siguruar stabilitet e paqe dhe për të marrë pjesë në misione humanitare dhe paqësore, me synim që të ketë vendin e vet në NATO”, theksoi kryeministri Mustafa. Ai siguroi se, Ushtria e ardhëshme e Kosovës do të jetë një forcë model, një institucion pasqyrë e Kosovës reale me gjithë koloritin e saj etnik e gjuhësor. “Kjo ushtri do të krijohet sipas standardeve ushtarake profesionale të NATO-s dhe do të jetë faktor shumë i rëndësishëm për paqen e stabilitetin në gjithë rajonin”, theksoi kryeministri i Kosovës. Mustafa vijoi se, Kosova me të gjitha institucionet e saj i bashkangjitet luftës së botës demokratike kundër terrorizmit dhe çdo lloj ekstremizmi. “Sot, edhe këtu pohoj fuqishëm se e ardhmja e këtij vendi është e sigurt. Kosova është vend i pavarur demokratik, i të gjithë qytetarëve të barabartë, është vend që nuk e harron të kaluarën e dhembëshme, por që poashtu është shumë i vendosur për të ecur përpara drejt jetësimit të synimeve të veta madhore”, u shpreh ai. Qeveria e Republikës së Kosovës, theksoi kryeministri Mustafa, është tërësisht e përkushtuar për të krijuar pespektivë zhvillimore, për të ndërtuar një shtet të së drejtës dhe për të thelluar partneritetin me vendet fqinje. Ceremonia ushtarake e FSK-së për nderë të Epopesë së UÇK-së sapo u zhvillua në Kazermën “Adem Jashari” në Prishtinë. Me rastin e 17 vjetorit të rënies heroike të Komandantit Legjendar Adem Jashari dhe Familjes Jashari, Qeveria e Republikës së Kosovës, në 5, 6 dhe 7 mars, organizon manifestimin gjithëpopullor . Në 5, 6 e 7 mars 1998, në Epopenë e Prekazit, në mbojtje të pragut të shtëpisë dhe Kosovës, në luftën për liri dhe pavarësi, ranë heroikisht 56 anëtarë të Familjes Jashari, 20 prej tyre të Familjes së ngushtë të Komandantit Legjendar të UÇK-së, Adem Jashari, në përballje me sulmin e egër të forcave serbe të kasapit të Ballkanit, Millosheviç, i cili ka përfunduar në Gjykatën Ndërkombëtare për Krime Lufte në Hagë.
