Data 26 shkurt 2016-të do të mbahet gjatë në mëndjen e shqiptarëve të Kosovës. Kryeqyteti kosovar, Prishtina në këtë ditë kishte dy pamje. Të protestës, tymit, dhunës si dhe të festës.
Sheshet kryesore ‘Ibrahim Rugova’, ‘Nënë Tereza’, të cilat nga mëngjesi deri në orët e pasdites kishin pamjen e luftës, ku prezent ishte koktej molotovi dhe përleshjet mes policisë dhe përkrahësve të opozitës së bashkuar, në orët e vona të mbrëmjes u kthyen në sheshe festive.
‘Fajtori’ kryesor për këtë ishte Hashim Thaçi, i cili u zgjodh president i Kosovës për pesë vitet e ardhshme.
Përkrahësit e tij pak minuta pas zgjedhjes në krye të shtetit vërshuan sheshet e kryeqytetit ku pak orë më parë qëndronin përkrahësit e opozitës së bashkuar në tendat që kishin ngritur nga dita e martë.
Zgjedhja e Thaçit president bëri që për herë të parë në Kosovë të ndezen fishekzjarre të shumta në sheshet e kryeqytetit, njëjtë sikur që bëhen në festat e ndërrimit të motmoteve.
Por, nuk munguan as të shtënat me armë zjarri si dhe brohoritjet Thaçi, Thaçi…
Festës së mbështetësve të PDK-së ju bashkangjitën edhe deputetë të kësaj partie të cilët nën ritmin e këngëve kaluan në këmbë shesheve të kryeqytetit.
Kjo festë e ‘shfrenuar’ e simpatizatëve të PDK-së siç duket ishte një kundërpërgjigje për opozitën e bashkuar që kundërshtuan fuqishëm në Kuvend zgjedhjen e Thaçit president por edhe për inat të mbështetësve të opozitës që protestuan gjatë ditës së sotme por edhe në ditët e kaluara kundër zgjedhjes së Thaçit në krye të shtetit.
Opozita u ‘mposht’ dhe Thaçi u zgjodh president falë deputetëve të Lidhjes Demokratike të Kosovës (LDK), dhe Listës Serbe.
Përveç në Prishtinë, simpatizantë të PDK-së edhe në Skendreaj, Prizren, Malishevë e komuna të tjera të vendit po festojnë zgjedhjen e liderit të tyre të partisë, president të Republikës.
Përkundër së dështuan ta ndalin zgjedhjen e Thaçit si kryetar të shtetit, liderët e opozitës në një konferencë të mbajtur rreth ores 21:00 deklaruan se veprimet e tyre nuk do të ndalen deri në shpalljen e zgjedhjeve të lira, duke thënë se Thaçi nuk mund të jetë president i vendit pasi ka shkelur Kushtetutën e vendit. /tesheshi.com/
