Ka përfunduar rreth orës 19.30 takimi mes delegacionit të Kosovës dhe atij të Serbisë në Bruksel. Në këtë takim, deri më tani dihet se është arritur marrëveshje për lëvizje të lirë mes Kosovës dhe Serbisë.
Siç bën të ditur “Presheva Jonë” në takim është kërkuar edhe heqja e urdhër-arresteve nga shkresat e Interpolit për politikanët e Kosovës. Siç mësohet është diskutuar për urdhëarrestin e Zv.kryeministrit Hashim Thaçi posaçërisht.
Siç dihet Serbia e ka nje listë të gjatë prej 300 emrash tek urdhër-arrestet drejtuar interpolit, ku pjesa më e madhe janë drejtues të institucioneve të Kosovës.
Kryesuesi i Delegacionit Teknik për bisedime për çështje të sigurimeve, Rrahim Pacolli, ka bërë me dije se është arritur marrëveshje për lëvizje të lirë mes Kosovës dhe Serbisë në Bruksel.
Përmes një njoftimi dërguar mediave, Pacolli ka thënë: “Pas shumë takimeve të mbajtura në Bruksel ndërmjet Delegacionit Teknik të Kosovës dhe Delegacionit serb me ndërmjetësim të BE-së, sot u nënshkrua marrëveshja për lëvizje të lirë ndërmjet shtetit të Kosovës dhe atij të Serbisë”.
“Pavarësisht pengesave të paraqitura nga pala serbe përgjatë këtyre takimeve, u arrit marrëveshja për njohjen reciproke të policave të sigurimit të detyrueshëm nga autopërgjegjësia me ç’rast do të përfitojnë qytetarët e Kosovës dhe qytetarët e Preshevës, Medvegjës e Bujanovcit”, thuhet në këtë njoftim.
Ora 14.00
Ka nisur në Bruksel takimi ndërmjet Kryeministrit të Kosovës, Isa Mustafa dhe homologut të tij Aleksandër Vuçiç me ndërmjetësimin e shefes së diplomacisë së BE-së, Federica Mogherini.
Para takimit asnjëra palë nuk është prononcuar para gazetarëve. Gjitçka do të bëhet e ditur nga orët e mbrëmjes, megjithatë axhenda është e fokusuar.
“Bashkësia e komunave serbe” në Kosovë, renditet e para nga “katër temat” e raundit të 26-të të dialogut në nivel të lartë kryeministror Prishtinë-Beograd, që u zhvillua sot në Bruksel. Media në Serbi ka renditur të dytën “energjetikën”, të tretën “telekomunikacionin” dhe të katërtën “Parkun e paqes” siç e quajnë barrikadën në urën kryesore mbi lumin Ibër të qytetit të Mitrovicës, që ndanë veriun me shumicë serbe nga jugu me shumicë shqiptare.
Burimet zyrtare në Prishtinë po ashtu theksojnë katër tema, me dallim vetëm në renditje, “energjinë, telekomin, barrikadën mbi urën e lumit Ibër në Mitrovicë dhe Asociacionin e komunave serbe”, duke bërë të ditur se për këto çështje para takimit të sotëm të kryeministrave të Kosovës e Serbisë në Bruksel kanë qëndruar dhe janë atje grupet punuese kosovare në kuadër të dialogut.
Ora 09.00
Sot ëshrë takimi i tretë mes kryeministrave Isa Mustafa e Aleksandar Vuçiç, krerëve të qeverive të reja të zgjedhjeve 2014 në të dy vendet, që u mbajtën më parë në Serbi e pastaj në Kosovë, ndërsa deri tash në procesin drejt normalizimit të marrëdhënieve, të kryesuar nga BE e mbështetur nga SHBA, janë zhvilluar 25 raunde të dialogut Prishtinë-Beograd në nivel të lartë, 23 mes kryeministrave të atëhershëm Hashim Thaçi e Ivica Daçiç.
Rraundi 25 i dialogut, i dyti Mustafa-Vuçiç , në 21 prill, ka përfunduar pa marrëveshje të re. Ndërmjetësuesja e dialogut, shefja e Politikës së Jashtme të Bashkimit Evropian, Federica Mogherini, bënte të ditur përmes një deklarate për media se dy palët kanë analizuar përparimin e bërë në zbatimin e marrëveshjeve të arritura në dialog, duke vënë theksin te zbatimi i Marrëveshjes për Drejtësinë dhe fillimi i zbatimit të marrëveshjeve për Mbrojtjen Civile.
“Dy palët po ashtu kanë shkëmbyer pikëpamjet për çështjet kryesore të pazgjidhura: energjinë, telekomin dhe krjimin e Asociacionit (të komunave serbe). Në këtë drejtim, ata janë pajtuar që të ndërmerren hapa konkretë deri në takimin e ardhshëm”, thuhej në deklaratën e Mogherinit.
Marrëveshja 15 pikëshe për Normalizimin e Marrëdhënieve ndërmjet Kosovës dhe Serbisë, e vlerësuar historike, e parafuar para dy vitesh, në 19 prill 2013, nga Thaçi e Daçiç, si dhe ndërmjetësuesja, Përfaqësuesja e Lartë e BE-së në atë kohë, Baronesha Catherine Ashton, në 6 pikat e para ka Asoaciacionin apo Bashkësinë e komunave me shumicë serbe në Kosovë:
“1. Do të ketë një Asociacion/Bashkësi e komunave të banuara me shumicë serbe në Kosovë. Anëtarësimi do të jetë i hapur për cilëndo komunë, me kusht që anëtarët pajtohen.
- Bashkësia/Asociacioni do të krijohet me statut. Zhbërja e tij/saj mund të ndodhë vetëm me një vendim të komunave pjesëmarrëse. Garancitë ligjore do të sigurohen përmes ligjit në fuqi dhe ligjit kushtetues (përfshirë 2/3 e shumicës së trupit vendimmarrës).
- Strukturat e Asociacionit/Bashkësisë do të themelohen mbi po të njëjtat baza sikurse statuti ekzistues i Asociacionit të Komunave të Kosovës, si për shembull, kryetari, zëvendëskryetari, Asambleja, Këshilli.
- Në pajtim me kompetencat e ofruara nga Karta Evropiane për Vetëqeverisje Lokale dhe ligjin e Kosovës, komunat pjesëmarrëse do të kenë mundësi në gjendje të bashkëpunojnë për të ushtruar fuqinë e tyre në gjithë Bashkësinë/Asociacionin. Asociacioni/Bashkësia do të ketë qasje të plotë në fushat e zhvillimit ekonomik, arsimit, shëndetësisë, planifikimit urban dhe rural.
- Asociacion/Bashkësia do të ushtrojë edhe përgjegjësi të tjera shtesë, varësisht se si delegohen nga autoritetet qendrore.
- Bashkësia/Asociacioni do të ketë një rol përfaqësimi te autoritetet qendrore dhe për këtë qëllim do të ketë një ulëse në këshillin konsultativ për komunitete. Në përputhje me këtë, është paraparë një funksion vëzhgues”.
“Në bisedimet e sotme në Bruksel, pala serbe do të insistojë në themelimin e Asociacionit të Komunave Serbe brenda dy muajve”. “Nëse realizohen pritjet e Beogradit zyrtar që Asociacioni i Komunave Serbe të themelohet brenda dy muajve, atëherë veriu i Kosovës do të mbetet nën kontrollin e Serbisë edhe për një kohë të pacaktuar. Prandaj kërkohet nga pala kosovare që sot në Bruksel të mos arrijë ndonjë marrëveshje, që ua zgjat jetën strukturave paralele që financohen nga Serbia”, shtohet më tej.
Përkujtohet se, “në Prishtinë është thënë disa herë se Asociacioni do të themelohet vetëm kur të sigurohet shpërbërja e tërësishme e strukturave ilegale” dhe se pjesë e tyre “në veriun e Kosovës nuk është vetëm ‘Civilna Zastita’ (Mbrojtja Civile) për të cilën është arritur një marrëveshje për transformim”.
Historiku i takimeve Beograd Prishtinë
Viti 2012:
Raundi 1 – 19 tetor
Raundi 2 – 7 nëntor
Raundi 3 – 4 dhjetor
Viti 2013:
Raundi 4 – 17 janar
Raundi 5 – 19-20 shkurt
Raundi 6 – 4 mars
Raundi 7 – 20 mars
Raundi 8 – 2 prill
Raundi 9 – 17 prill
Raundi 10 -19 prill
Raundi 11 – 21 maj
Raundi 12 – 20-21 qershor
Raundi 13 – 8 korrik
Raundi 14 – 24 korrik
Raundi 15 – 27 gusht
Raundi 16 – 8 shtator
Raundi 17 – 7 tetor
Raundi 18 – 6 nëntor
Raundi 19 – 5 dhjetor
Raundi 20 – 13 dhjetor
Viti 2014:
Raundi 21 – 27 janar
Raundi 22 – 12 shkurt
Raundi 23 – 31 mars
MUSTAFA-VUÇIÇ:
Viti 2015:
Raundi 24 – 9-10 shkurt
Raundi 25 – 21 prill
Raundi 26 – pritet sot, 23 qershor/tesheshi.com/
