Politika shqiptare rikthen muskujt dhe intrigat e vjetra, duke tronditur opinionin publik me deklarata mbi male dhe moçale, fjalësh të dhëna e të mbajtura, si dhe veprime në prapaskena, pa asnjë transparencë dhe me kode, por edhe duke përdorur pushtete paralele.
Siç ka ndodhur në vitin 2001 kur Nano është përplasur me Metën, media është polarizuar duke krijuar skema fantazmagorike.
Njëra prej tyre ishte ajo e Nikollë Lesit që fliste për një takim Rama-Basha në Vjenë, që siç mësohet është sajuar nga një takim i një këshilltari të kreut të Kuvendit me disa botues të mëdhenj në vend.
Pritet që këto ditë të hidhen në treg skema të tjera për të mbështetur skenarin e një komploti të sajuar jashtë ndërmjet kryeministrit dhe liderit të opozitës.
Por lëvizjet nuk mjaftojnë me kaq. Në skenë është futur edhe ndonjë pushtet i pavarur siç është Kontrolli i Lartë i Shtetit, i cili me një denoncim në prokurori ka hedhur një bombë tymuese duke trazuar çështjen e CEZ.
Kështu, ndërsa po flitet që hetimet kanë të bëjnë me një çështje që i përket menaxhimit të CEZ-it në kohën e çekëve, KLSH dërgon në prokurori Arben Seferin, njeriu që mori në dorë CEZ-in pa çekë dhe bëri gati rishtetëzimin e kompanisë.
Ndërkaq, nga Rogneri ka dalë një mesazh shumë i forte, të cilin po ta ç`kodosh, paralajmëron një zhvillim apo shantazh të madh. “Kur unë dhe doktori themi po, atëherë ajo është po”, tha Ilir Meta, i cili pati një qëndrim në një linjë me Berishën por të ndryshëm nga Lulzim Basha dhe Edi Rama. /tesheshi.com/
