Andrzej Duda u betua sot para Asamblesë Kombëtare si presidenti i ri i Polonisë. Si sfidanti konservator në zgjedhjet e fundit presidenciale, Duda i zuri vendin Bronislaw Komorowski-t, i cili garoi për një mandat të dytë dhe mendohej të ishte fituesi i atyre zgjedhjeve në maj.
Presidenti i ri përfaqësoi në ato zgjedhje partinë konservatore Ligj dhe Drejtësi, si partia më e madhe e opozitës, ndërsa Komorowski pati mbështetjen e Platformës Civile, partisë së qendrës së djathtë, e cila ka qeverisur që nga viti 2007.
Mbajtësi i ri i postit presidencial përsëriti në fjalën e tij premtimet elektorale, si dhe bëri të qartë se do të kërkojë një politikë të jashtme më aktive dhe më të vendosur. Ai u shpreh se Polonia do të kërkojë më tepër unitet brenda BE-së, e se do të vazhdojë ta forcojë ushtrinë e vet, si “garantuesen fundamentale të pavarësisë,” në një kohë të përshkuar nga konflikti në Ukrainën lindore.
Duke i mëshuar çështjes së sigurisë, Andrzej Duda kërkoi nga NATO-ja që të bëjë më shumë për rajonin.
“Të gjithë ne në Europën qendrore e lindore kemi nevojë për një prani më të madhe të NATO-s këtu, duke patur parasysh situatën e vështirë aktuale gjeopolitike.”
Gjithashtu ai shprehu synimin për t’u dhënë fund ndasive politike në vend, edhe pse ato nxorën krye dhe gjatë fjalës së tij. Kështu, kur ai falënderoi Lech Kaczynski-n, presidentin që humbi jetën në një aksident ajror në Rusi në vitin 2010, vetëm parlamentarët e partisë Ligj dhe Drejtësi u ngritën në këmbë duke duartrokitur. Ligjvënësit e krahut tjetër politik, të Platformës Civile, nuk përtuan ta kritikojnë fjalën e presidentit. “Presidenti Duda e ngatërroi fatkeqësisht fjalën me një manifestim elektoral, “ do të shprehej një prej tyre.
Roli i presidentit polak është përgjithësisht ceremonial, por presidenti ka të drejtën të vërë veton për ligjet e të bëjë propozimet e tij, si dhe drejton forcat e armatosura. Duda është presidenti i gjashtë i vendit që prej rënies së komunizmit. /tesheshi.com/
