Nga Blendi Gashi
Kreu i LDK-së, Isa Mustafa, pas tradhëtisë që ja bëri Kadri Veseli duke e rrëzuar nga posti i kryeministrit, në shenjë harkmarrjeje po bën të “fortin” duke thënë se as miqtë ndërkombëtarë nuk do ta bindin që të hyn sërish në bashkëqeverisje me PDK-në
Këtë thotë se ua ka bërë të njohur përfaqësuesve të BE-së dhe të SHBA-së me kohë, para se të votohet mocioni i mosbesimit ndaj qeverisë së tij.
Pavarësisht këtij paralajmërimi, ambasadorët e huaj kanë nisur thirrjet që të krijohet një qeveri stabile dhe ekzekutivi i ri të mos varet nga 61 numra, për faktin se vendin e presin procese tejet të ndjeshme. Një kërkesë të tillë sëfundmi e paraqiti ambasadorja gjermane Angielika Viets.
Andaj shtrohet pyetja: sa duhet marrë seriozisht ky kërcënim i Mustafës kur kihet parasysh se në vitin 2014-të pikërisht me kartën anti-PDK dhe anti-SHIK erdhi në pozitën e kryeministrit dhe përfundoi së pari në krahët e Thaçit e më pas të Veselit?
Sigurisht se Mustafa si një politikan në fund karriere nuk do të ishte asapak e habitshme që të ribëjë një koalicion me PDK-në apo të hynte në një qeveri të gjërë nëse ndërkombëtarët shtrëngojnë “dhëmbët”.
Ja ç’mendojnë analistët…
Analistët politikë thonë nuk i shohin shumë serioze deklaratat e kreut të LDK-së pasi thonë se zëri i ndërkombëtarëve do dëgjohet nga secila parti, ashtu siç ka ndodhur edhe vitet e kaluara kur ka pasur ngërçe politike.
Leon Duhanaj, njohës i rrethanave politike thotë se po të mos ishin SHBA dhe BE politikanët vendas jo vetëm që nuk do të kishim arritur të bëjmë ndonjë marrëveshje për qeverisje, por, madje do ta kallnim Kosovën të tërën për shuarjen e apetitëve të sëmura politike.
“Nuk besoj që shtetet mike do të përzihen në proçes përderisa vendorët mund të sjellin rezultate pa ndikinin e tyre. Por, do të ndërhynë gjithsesi në momentin që shohin bllokadën e vendosur mes njëri-tjetrit. Ata ndërhynë sepse dëshirojnë ta ruajnë dhe konsolidojne shtetit e Kosovës, për lirinë dhe zhvillimin e tij, kanë kontribuar dhe financuar shumë! Këndej, jo vetëm Isa Mustafa, por secili lider, secili deputet, apo qytetarë, i cili ia do t’mirën këtij vendi është i obliguar dhe duhet t’i pranoj sugjerimet e tyre”, thotë Duhanaj për tesheshi.com.
Ndërsa analisti politik, Fadil Lepaja, mendon se Isa Mustafa me deklarimet e bëra po i ofohet vet ndërkombëtarëve që ta përfshijnë edhe LDK-në në qeveri.
“Unë mendoj se z.Mustafa është i hutuar me mosinsistimin e bashkësisë ndërkombëtare sepse mendoj se ky do të ishte rast i mirë për të bërë një kthesë të pranueshme nga ana e elektoratit. Kësaj radhe bashkësia ndërkombëtare bëri negociata me z. Pacolli dhe i njëjti e hapi rrugën për votim individual përmes propozimit të tij ( për një qeveri tëgjërë me mandate një apo dy vjeçar).
Deklarimet e tij se nuk hyn në koalicion me PDK-në edhe nëse ja këkojnë SHBA dhe BE janë blof i tij për me ngrit çmimin”, thotë Lepaja për tesheshi.com.
Islam Krasniqi, njohës i rrethanave politike thotë se LDK-ja nuk e ka fuqinë që ta refuzojë kërkesën e BE-së, dhe deklarata e Mustafës është vetëm arsyetim karrshi elektoratit të vet dhe asgjë më shumë.
“Nëse ndalim dhe e shikojmë të kaluarën e kuptojmë se Isa Mustafa parim e ka vetëm kolltukin, dhe shpëtimin e vet. Mustafa dhe LDK-ja pas zgjedhjeve të 2014-tës harruan fyrjet dhe akuzat ndaj PDK-së dhe lidhi koalicion dhe kjo mund të ndodhë sërish. LDK-ja do të mundohet të qëndrojë larg koalicionit PAN, mirëpo një kërkesë e SHBA-ve, do të bëjë që partia e Mustafës të ndërrojë mendje”, thotë Krasniqi për tesheshi.com.
Kujtojmë se krerët e koalicionit PAN Kadri Veseli dhe Ramush Haradinaj janë shprehur haptas “pro” bashkëqeverisjes me LDK-në. Por kjo e fundit ka thënë se mund të lidh koalicion qeverisës me AAK-në dhe NISMA-n vetëm nëse këto parti dalin nga PDK.
