Zbardhet i tëri operacioni i grabitjes së parave të bankave para dy vitesh dhe një javë më parë, pasi policia ka gjetur prova të pakundërshtueshme në banesat e 4 të arrestuarve.
Paratë e gjetur në banesat e tyre janë pikërisht monedhat e shënuara nga banka dhe që janë vjedhur gjatë dy operacioneve.
Ndërkaq, tashmë është profilizuar edhe funksionimi i bandës që janë të gjithë ushtarakë profesionistë.
Menjëherë pas kapjes së 4 prej të dyshuarve si grabitës së parave të bankës në Rinas, kanë dalë kryeministri Edi Rama dhe ministri i Brendshëm Saimir Tahiri që e kanë cilësuar si “operacion shembullor”, jo atë të grabitjeve por të policisë për kapjen e tyre. Ndërsa Tahiri iu thye të gjithë atyre që e kishin akuzuar policinë për paaftësi dhe lidhje me krimin, Edi Rama e cilësoi si “profesionalizëm” zbulimin e autorëve.
“Policia Shtetit tregoi perseri se forca e saj zbuluese e goditese rritet perdite! Zbardhja e shpejte e grabitjes se bankes sukses shembullor”, shkruan Rama në Facebook.
Drejtori i Policisë së Tiranës Ervin Hodaj në një konferencë për shtyp bëri publik emrat e katër të dyshuarve që janë tashmë të arrestuar nga operacioni “Patriot”.
Ata janë:
- Fation Xhyliu , 33 vjec, lindur në Lushnje banues në Tiranë, ish punonjës në Shpsf “Rogat”
- Ditjon Memlika, 31 vjec, lindur në Tepelene dhe banues ne Tiranë, ish efektiv në forcat ushtarake
- Neim Avdulaj, 28 vjec, lindur në Vlorë dhe banues në Tiranë, ish ushtar profesionist në forcat ushtarake te Zallherrit.
- Ernest Kupa, me banim në Krujë, me biznes privat.
Ndërkohë, janë shpallur në kërkim shtetasit me iniciale M.A., dhe Ç.A. dhe po punohet për kapjen e tyre.
Gjatë aksionit janë sekuestruar vlera monetare të konsiderueshme në valutën paund, dollarë amerikane, kanadezë dhe australianë, euro dhe lekë shqiptare, (kartmonedha këto të deklaruara në transportet monetare të vlerave të bankave respektive). /tesheshi.com/
