Agron Duka, kryetari i Partisë Agrare, pasi ka munguar në mitingun e opozitës për Kryeprokurorin e përkohshëm, ka kryer një tjetër veprim që i bën karshillëk Lulzim Bashës.
Kreu i PAA-së ka mbledhur në një takim “privat” por dukshëm publik pesë kryetarë partish të ashtuquajtura të vogla, por që realisht të gjithë ose parlamentare ose ish-parlamentare, që nga ish-presidenti Bamir Topi, kryetar i Frymës së Re Demokratike; Ben Blushi, kreu i LIBRA-s; Vangjel Dule, kryetar i PBDNJ-së; Nard Ndoka shef i demokristianëve dhe Dash Shehi, drejtues historik i LZHK-së.
Duka shkruan se “Sot në Durrës pata kënaqësinë të kisha Dashin, Bamirin, Benin, Nardin dhe Vangjelin për një bilanc të vitit që po mbyllet, por folëm edhe për çfarë na pret në 2018”.
Edhe pse nuk e ka bërë të ditur krejt hapur, Agron Duka e ka paralajmëruar gati shkoqur se në janar do të ketë një konfigurim tjetër të një aleance politike. E cila ka shumë “gjela” por a do të ketë “ushtarë”?
Normalisht, është koha që do ta vërtetojë. Por fakt është se përveç Dukës që mungoi në mitingun e djeshëm, edhe Dulja e Ndoka, nuk se u vunë re, si në Kuvend ashtu edhe në protestë. /tesheshi.com/
