Me dhjetra lokale dhe restorante në rrugën e Shirokës mund të prishen, referuar planit të ri urbanistik për Bashkinë e Shkodrës.
Kjo të paktën është pohuar nga kryebashkiakja Voltana Ademi gjatë dëgjesave të zhvilluara në lidhje me projektin për rikualifikimin e zonës së Shirokës në liqenin e Shkodrës.
Ademi ia ka hedhur përgjegjësinë kryeministrit Edi Rama, ndërsa studio spanjolle e përzgjedhur për planin ka paraqitur 3 projekte, nga të cilat vetëm njëri parashikon prishjen e ndërtimeve.
Në dëgjesën publike të bashkisë Shkodër ku morën pjesë edhe disa prej pronarëve të restoranteve, u paraqit pikërisht projekti që parashikon prishjen e ndërtimeve dhe jo dy të tjerët, raporton Shkodra Neës.
Kryebashkiakja Voltana Ademi është shprehur përpara pronarëve se është kryeministri ai që kërkon të prishë ndërtimet në një kohë që qeveria ka mundësuar vetëm studion spanjolle, e cila ka paraqitur tre projekte. Në rast se bashkia vendos zbatimin e projekteve me prishje ndërtimesh atëherë prefektura e qarkut Shkodër me shumë gjasa nuk do t’i japë ligjshmërinë dhe kjo e kthen mbrapsht projektin.
Fillimisht duhet firma e prefekturës dhe më pas projekti të dërgohet në qeveri për miratimin përfundimtar, por në rast se prefektura nuk e firmos atëherë e gjitha dështon.
Në këtë mënyrë bashkia duhet të zgjedhë një prej projekteve që nuk parashikon prishje ndërtimesh ose në të kundërt ky projekt i rëndësishëm për rikualifikimin e liqenit të Shkodrës nuk realizohet dhe kjo është humbje e madhe për atë zonë turistike. /tesheshi.com/
