Benazir Bhutto, ish-kryeministrja e Pakistanit, dhe e para femër në këtë post në botën muslimane, u vra më 27 dhjetor të 2007-ës, pak më tepër se dy muaj pas rikthimit të saj në vend.
Ajo u vra gjatë një mitingu të Partisë Popullore të Pakistanit, të cilën e udhëhiqte gjatë asaj kohe. Një prej politikaneve më të njohura në botë të kohës së vet, përvjetori i tetë i vrasjes së saj u përkujtua në tërë Pakistanin.
Djali i saj, Bilawal Bhutto-Zardari, e njëkohësisht bashkëkryetar i Partisë Popullore të Pakistanit, drejtoi një takim dhe mbajti një fjalim para njerëzve pas vizitës në varrin e së ëmës.
Ai e përshkroi partinë e tij si viktimë të vrasjesve të njëpasnjëshme, e gjithashtu kritikoi Planin Kombëtar të Veprimit, i synuar për të luftuar terrorizmin.
E lindur më 21 qershor 1953 dhe e ardhur nga një familje e pasur, e marrë tradicionalisht me politikë, Benazir Bhutto do të shpallej gjatë karrierës së vet politike mes 100 udhëheqësve më të fuqishëm të botës.
Ajo ishte kryeministrja e 11-të e Pakistanit, dhe qëndroi në detyrë gjatë viteve 1988-1990 dhe 1993-1996. /tesheshi.com/
