Të gjithë jemi shumë të njohur me institucionin e Eurovizionit, por shumë e kanë harruar atë të Intervision, një konkurs këngësh jetëshkurtër i krijuar në mesin e viteve ‘60 si një përgjigje komuniste ndaj festivalit fantazmagorik të muzikës perëndimore. Por së shpejti mund të shohim një ringjallje të eventit, siç deklaroi vetë Vladimir Putin në një intervistë që dha për agjencinë Xinhua përpara vizitës së tij në Kinë.
Konkursi i Muzikës Intervision, në të cilin morën pjesë vendet e Bllokut Lindor, u organizua për herë të parë në 1965 në Çekosllovaki. Vendi priti konkursin edhe për tre vite të tjera përpara se të anulohej përfundimisht. Në vitin 1977 institucioni “u zhvendos” në Poloni, ku zëvendësoi Konkursin Ndërkombëtar të Këngës Sopot, duke lejuar madje pjesëmarrjen e vendeve si Kuba, Republika Domenikane, Mongolia dhe Peruja. Sidoqoftë, nga fillimi i dekadës pasuese, eventi humbi popullaritetin e saj dhe u anulua përsëri.
Përpjekjet e mëvonshme për ta përsëritur atë dështuan, me përjashtim të festivalit muzikor të vitit 2008, në të cilin morën pjesë njëmbëdhjetë vende dhe ku Taxhikistani doli si fitues. Në vitin 2009, kryeministri i atëhershëm rus Vladimir Putin propozoi rinisjen e konkursit, këtë herë duke përfshirë Rusinë, Kinën dhe shtetet e tjera anëtare të Organizatës së Bashkëpunimit të Shangait. Përpjekja më serioze për të ringjallur Intervision u zhvillua në vitin 2014. Plani ishte që të zhvillohej konkursi në Soçi, i cili priti Lojërat Olimpike Dimërore po atë vit. Shtatë vende kishin shprehur interes për të marrë pjesë në ngjarjen e tetorit, disa muaj pas Eurovizionit në të cilin një biseksuale, Konchita Wurtz, u kurorëzua fituese, një fitore që Rusia e pa si tregues të “kalbjes morale” të Perëndimit.
Konkursi përfundimisht nuk u zhvillua, por ideja për ta ringjallur atë duket se ka qenë e rrënjosur fort në mendjen e Putinit. Duke folur për agjencinë kineze të lajmeve, presidenti rus tha se po përgatit projekte të mëdha bashkëpunimi me Pekinin, ku përfshihet edhe Intervision. “Kina është një partner kyç në këtë projekt”, i cili do të nxjerrë në pah dhe do të promovojë këngë me karakter kombëtar, tha presidenti rus.
Para intervistës së Putinit, agjencia ruse e lajmeve Tass kishte zbuluar planet e reja të Kremlinit për të ringjallur Intervision, duke theksuar se do të mbahet në Rusi këtë vit me pjesëmarrjen e ndoshta shtatë vendeve.
Në intervistën e tij për Xinhua, megjithatë, presidenti rus nënvizoi rolin e Kinës, duke shprehur edhe admirimin e tij për kulturën e këtij vendi.
“Për sa i përket qëndrimit tim personal ndaj kulturës kineze, dua të theksoj se gjithmonë kam shijuar të zbuloj traditat unike dhe autentike të Kinës. Unë di shumë pak për artet tuaja marciale, duke përfshirë Wushu, i cili është shumë i popullarizuar në vendin tim. Kam respekt të madh edhe për filozofinë kineze. Anëtarët e familjes sime janë gjithashtu të interesuar për Kinën dhe disa prej tyre po mësojnë kinezisht”, shtoi Putin. /tesheshi.com/
