Qeveria e Kosovës dhe ajo e Shqipërisë duhet të tërheqin propozimin e tyre për rivarrosjen e eshtrave të Isa Boletinit në Vlore, ndërkohë që familjarët e Isa Boletinit këtë marrëveshje e kanë cilësuar si të “kontrabanduar” dhe të ndryshuar nga dy familjarë tjerë, duke kërkuar që eshtrat e Isës dhe bashkëluftëtarëve të tij të rivarrosën në Boletin. Të gjitha këto janë thënë sot në mbledhjen e jashtëzakonshme të Kuvendi Komunal të Mitrovicës.
Ky Kuvend, ka dalë me disa konkluzione, të cilat do t’iu drejtohen institucioneve më të lartë të Kosovës dhe atyre të Shqipërisë.
Ndër shumë diskutantë, të gjithë pothuajse duke renditur arsyet se përse eshtrat e Isës nuk duhet të prehen në Vlorë, ishte përfaqësuesi i Vetëvendosjes, Faruk Mukja, i cili tha: është një fakt i pamohueshëm që fshati Boletin është zgjidhja e më e natyrshme, e drejtë dhe logjike, që të prehet në paqe Isa Boletini. Aty ku është Kulla e tij, ku janë gurët e Boletinit të cilët nuk donte t`i ndërronte as me sarajet e Stambollit”, ka thënë Faruk Mujka, duke shtuar më pas: “Mosguximi i Qeverisë për t`i rivarrosur eshtrat e Isa Boletinit në vendlindjen e tij, ndonëse po tentohet të shfaqet si spektakël se rivarrimi i eshtrave në Vlorë po bëhet për arsye simbolike, s’është gjë tjetër përveç braktisje e trojeve të Isa Boletinit, idealeve të tij dhe të Lëvizjes Kombëtare Shqiptare në mbrojtje të çdo pjese të atdheut. Ky vendim nuk i shkon për nder as kryeministrit Rama, i cili këtë e bën vetëm për përfitime politike në prag të zgjedhjeve lokale në Shqipëri, pos nëse nuk është edhe një komplot i përbashkët. Nuk ma merr mendja se Isa Boletini do të kishte dëshiruar që me rivarrimin e tij jashtë Boletinit të përligjet ndarja e Kosovës dhe të dëshmohet se lufta dhe vdekja e tij kanë qenë të kota”, tha Mukja. /tesheshi.com/
