Mbështetësit e grupit ekstrem të djathtë islamofob Pegida organizuan një demonstratë kundër Islamit përpara një xhamie në Holandë të mërkurën mbrëma.
Demonstrata u mbajt jashtë xhamisë së Abu Bakr Issidik, të frekuentuar nga pjesëtarë të komunitetit maroken, në Utrecht, Holandën qendrore.
Gjatë demonstratës, anëtarët e Pegidës mbajtën fjalime si dhe shfaqën një film që fyen Islamin.
Rreth xhamisë u ndërmorën masa të forta sigurie, duke përfshirë instalimin e barrikadave të larta dhe u dërguan shumë policë në këtë zonë.
Pas demonstratës së Pegidës, disa banorë lokalë pas barrikadave u përleshën me forcat e sigurisë, ku dhe u arrestuan dy persona.
Jamal Houri, sekretar shtypi pranë xhamisë, tha se Pegida po përpiqet të provokojë qëllimisht.
“Edhe pse zona që ata zgjodhën për demonstratën ishte zonë provokuese, administrata e xhamisë dhe komuniteti vendosën të mos ndiqnin provokimin e tyre dhe t’i injoronin plotësisht”, tha Houri.
“Kjo është përgjigja më e mirë që mund t’i japim atyre, sepse duke u kushtuar vëmendje e gjitha do të jetë në favor të tyre”, shtoi ai./Tesheshi.com
