Partitë kosovare kanë nisur akuzat mes tyre në fushatën zgjedhore ku mundohen të fitojnë kredo politike duke ia shpalosur të palarat njëra-tjetrës.
PDK-ja e Lipjanit ka kallëzuar në Prokurorinë Themelore në Prishtinë kryetarin e komunës Imri Ahmeti, njëherësh kandidat i LDK-së për mandatin e dytë. PDK akuzon Ahmetin se e ka mbështetur financiarisht në mënyrë jo ligjore Miss Kosovën, Kaltrina Neziri.
PDK akuzon Ahmetin se me paratë e qytetarëve i ka paguar udhëtimin bukuroshes Neziri për në Filipine, por sipas tyre udhëtimi i saj ka dështuar dhe mjetet financiare ajo i ka përdorur për rregullimin e dhëmbëve.
Ky kallëzim penal i PDK-së së Lipjanit ndërlidhet me keqpërdorimin e pozitës apo autoritetit zyrtar nga neni 422 i KPRK-së.
“Kryetari aktual i komunës, duke përdorur pozitën zyrtare, ka marrë vendimin nr. 400-43900 të datës 30.10.2104, për mbështetje financiare të Kaltrina Neziri, Miss Kosova, për udhëtimin e saj në Filipine për të përfaqësuar Kosovën në garën e bukurisë. Mirëpo, për shkak të mosrealizimit të udhëtimit, e lartcekura mjetet deklaron se i ka përdorur për rregullimin e dhëmbëve”, thuhet në njoftimin e PDK-së së Lipjanit. /tesheshi.com/
