PD përshëndeti krijimin e SPAK-ut, por nuk ndau këtë zhvillim, ndër më të rëndësishmit e Reformës në Drejtësi, nga akuzat e zakonshme.
“Pas vendimit të sotëm të Këshillit të Lartë të Prokurorisë, Partia Demokratike përshëndet ngritjen e SPAK-ut dhe mbështet funksionimin e pavarur të kësaj strukture. Megjithëse qeveria bëri gjithçka për ta vonuar ngritjen e SPAK-ut me 3 vjet, Partia Demokratike, e cila ka miratuar ligjin për ngritjen e tij dhe të Byrosë Kombëtare të hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture.
Fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur”, tha nr.2 i demokratëve Gazmend Bardhi.
Më tej, ai potencoi tezën opozitare se “AntiKÇK”-ja Ramës pengon SPAK e BKH. “Në ditën e ngritjes së tij, SPAK ka përballë të njëjtin kundërshtar që e pengoi për 3 vjet me rradhë. Me një shfaqje qesharake propagandistike, Edi Rama, njoftoi dublimin me ligj të SPAK-ut dhe BKH-së, duke i dhënë policisë kompetenca që Gjykata Kushtetuese ia rrëzoi 4 vjet më parë.
Në thelb, ligji RKÇK – Rama Kap ÇA T’KAPËSH – nuk ka asnjë masë të re domethënëse nga ligjet ekzistuese kundër krimit të organizuar dhe mafias. Masat e prezantuara janë sot ose në Kodin Penal, ose në ligjin antimafia. E reja e vetme e ligjit ‘Rama Kap Ça t’Kapësh’ është marrja e kompetencave të SPAK-ut dhe BKH-së, duke ia dhënë ato një grupi nën kontrollin e Kryeministrit”, theksoi Bardhi. /tesheshi.com/
