Ursula von der Leyen do të vizitojë të gjashtë vendet e Ballkanit Perëndimor nga 28 deri më 30 shtator, duke filluar me Shqipërinë dhe Maqedoninë e Veriut.
Presidentja e Komisionit Evropian Ursula von der Leyen gjithashtu do të diskutojë mosmarrëveshjen midis Maqedonisë së Veriut dhe Bullgarisë në Shkup javën e ardhshme, konfirmoi zëdhënësi i KE, Eric Mamer.
Mamer nuk ishte në gjendje të jepte më shumë detaje dhe tha se këto çështje do të hapen në konferencat për shtyp që Von der Leyen do të mbajë në rajon.
“Presidentja po shkon në Ballkanin Perëndimor për të konfirmuar angazhimin e Bashkimit Evropian në rajon. Këta janë partnerë të BE-së me të cilët kemi lidhje të forta dhe vizita do të jetë një mundësi për të diskutuar këto marrëdhënie, përfshirë këtë çështje bilaterale,” tha Eric Mamer, duke iu referuar mosmarrëveshjes maqedono-bullgare.
Kreu i Komisionit Evropian do të vizitojë këtë rajon një javë para Samitit BE-Ballkani Perëndimor, i cili do të mbahet më 6 tetor në Slloveni.
BE këmbëngul se samiti nuk do të jetë një “samit i zgjerimit”, por një mundësi për të diskutuar marrëdhëniet midis Bashkimit dhe rajonit të Ballkanit Perëndimor. /tesheshi.com/
