Nga Blendi Gashi
Qeveria “Mustafa” e cila u rrëzua me mocion mosbesimi, po përgatit një të ngjashëm daj qeverisë “Haradinaj” dhe ky revansh pritet të ndodhë pas balotazhit të 19 nëntorit të zgjedhjeve lokale.
Megjithatë, për momentin kjo është vetëm një ide e LDK-së që ende nuk ka nisur të jetësohet dhe për të hyrë në rend dite të Kuvendit duhet të përkrahet nga 40 nënshkrime të deputetëve, ndërsa për të kaluar mocioni duhet votuar së paku 61 deputetë.
Është nënkryetari i LDK-së, Lutfi Haziri, i cili ditë më parë ka deklaruar se mocioni i votëbesimit ndaj qeverisë “Haradinaj” do të ndodhë shumë shpejt, madje ai ka bërë të ditur se një iniciativë e tillë është çështje ditësh.
Ndërsa Lëvizja Vetëvendosje është e gatshme ta shqyrtojë një iniciativë të tillë për ta rrëzuar Haradinajn ende pa i bërë 100 ditë në pushtet, deputetët e mazhorancës e quajnë një lojë politike dhe fushatë në prag të balotazhit për lokalet.
Shqipe Pantina, deputete e Vetëvendosje-s thotë se partia e saj ende nuk ka marrë zyrtarisht një kërkesë të tillë nga LDK-ja, pra nuk i është prezantuar ideja për mocionin në fjalë.
“Zyrtarisht nuk kemi pranuar një ide të tillë si parti. Do ta shohim se çfarë përmbatje përmban kjo iniciativë. Pa pasur një koordinim të mirë nuk është lehtë të rrëzohet qevera. Andaj nuk bën të ngutemi sepse nëse dështon mocioni atëherë duhet të pritet gjashtë muaj për të ngritur një mocion tjetër”, thotë Pantina për tesheshi.com.
“Lojë politike për fushatë elektorale”
Mocioni i përfolur i LDK-së, për deputetët e partive në pushtet, ëshët vetëm një lojë politike për të fituar ca vota më shumë në balotazhin për zgjedhjet lokale.
Teuta Haxhiu, deputete e AAK-së mendon se partia e Isa Mustafës nuk do ketë sukses ta rrëzojë Ramushin.
“Nuk është një punë që do të duhej të ndodhte, por deklarata të tilla po bëhen sa për konsum politik dhe për të dërguar mesazhe për zgjedhjet lokale aty ku janë në balotazh të gjitha partitë. LDK si parti institucionale siç i thotë vetës do të duhej të mendonte për të ndërmarrë një veprim të tillë veç nëse qeveria Haradinaj ka bërë shkelje të madhe e çka nuk ka ndodhur por ka treguar sukses vetëm nga fillimi e nuk është dhe nuk do të rezultojë e dështuar si qeveria ‘Mustafa’. Andaj mocioni i cili pretendohet të ngritet nga opozita, pra veç nëse ndodhë, besoj fuqishëm se do të dështojë”, thotë Haxhiu për tesheshi.com.
Ndërsa deputeti i NISMA-s, Zafir Berisha i cili është parë si një nga deputetët e mazhorancës që mund të votojë “pro” rrëzimit të qeverisë aktuale, e quan një ide për të prodhuar politikë ditore që sipas tij nuk mund të sjellë rezultat.
“Mocionet pa filluar ende mirë punën qeveria janë vetëm për politikë ditore dhe idetë e tilla nuk i parapëlqej. Për të kërkuar mocion mosbesimi duhet të ketë arsye shumë të fortë dhe bindëse. Çdo iniciativë tjetër sa për të bërë lajm rezultaton e pasuksesshme” thotë Berisha për tesheshi.com.
Ja ç’thotë Rregullorja e Kuvendit – Neni 30 për mocionin e mosbesimit për kryeministrin:
- Me propozimin e një të tretës (1/3), përkatësisht të 40 deputetëve të Kuvendit, mund të merret mocioni i mosbesimit për Kryeministrin.
- Mocioni i mosbesimit, i nënshkruar nga së paku një e treta (1/3), përkatësisht nga 40 deputetë, pranohet kur për të voton shumica e të gjithë deputeteve të Kuvendit.
- Mocioni i mosbesimit vihet në rendin e ditës, jo me vonë se pesë (5) ditë dhe jo më herët se dy (2) ditë nga dita e parashtrimit të tij.
- Nëse mocioni i mosbesimit votohet për qeverinë në tërësi, qeveria konsiderohet në dorëheqje.
- Nëse mocioni i mosbesimit dështon, një mocion tjetër i mosbesimit mund të parashtrohet vetëm pas nëntëdhjetë (90) ditëve të ardhshme. /tesheshi.com/
