Një kandidat në zgjedhjet presidenciale të Ekuadorit është qëlluar për vdekje në një takim fushate.
Fernando Villavicencio, 59 vjeç, një anëtar i asamblesë kombëtare të vendit, u sulmua teksa po largohej nga takimi në qytetin verior të Quitos të mërkurën.
Një anëtar i ekipit të tij të fushatës tha për mediat lokale se Villavicencio po hipte në një makinë kur një burrë e tërhoqi dhe e qëlloi në kokë.
https://twitter.com/i/status/1689464629410324480
Presidenti aktual Guillermo Lasso premtoi se “krimi nuk do të mbetet i pandëshkuar”.
Dëshmitarët thanë se Villavicencio, 59 vjeç, u qëllua tre herë.
Nëntë persona të tjerë, duke përfshirë një kandidat për deputet dhe dy oficerë policie, u plagosën në sulm, shtoi zyra e prokurorisë.
Movimiento Construye, partia e të ndjerit, tha se zyrat e saj në kryeqytet u sulmuan nga persona të armatosur në një incident tjetër.
https://twitter.com/i/status/1689440324010090496
Ajo shtoi se mundësia e pezullimit të tubimeve partiake ishte shqyrtuar kohët e fundit për shkak të dhunës politike pas vrasjes së kryebashkiakut në Manda në korrik. Por Fernando Villavicencio e kishte kundërshtuar këtë ide, duke konsideruar se “të heshtësh dhe të fshihesh kur kriminelët vrasin qytetarë dhe zyrtarë qeveritarë do të ishte burracakëri”.
Rritja e fundit e dhunës, e nxitur nga prania e vazhdueshme e karteleve të drogës në Ekuador, ka qenë një çështje kryesore në fushatën presidenciale të këtij viti.
Fushata e Villavicencio ishte përqendruar në trajtimin e korrupsionit, një çështje që ai e kishte mbuluar gjatë karrierës së tij të mëparshme si gazetar dhe sindikalist, dhe reduktimin e shkatërrimit të mjedisit.
Javën e kaluar, ai tha se ai dhe ekipi i tij ishin kërcënuar nga kreu i një bande të trafikut të drogës.
Madje Fernando Villavicencio po drejtonte një hetim kundër korrupsionit për lidhjen e karteleve të drogës me qeverinë e mëparshme të majtë.
Vitet e fundit, Ekuadori, midis Kolumbisë dhe Perusë, është goditur nga një valë dhune që i atribuohet bandave të trafikut të drogës.
Në mes të një procesi parazgjedhor, u vra një kryetar bashkie dhe një kandidat për deputet. Ndërsa para zgjedhjeve komunale të shkurtit u vranë dy kandidatë. /tesheshi.com/
