Disa prodhues të vaksinave COVID-19 duhet të ndjekin shembullin e AstraZeneca-s dhe të licencojnë teknologjinë për prodhuesit e tjerë, tha Drejtori i Përgjithshëm i OBSH-së Tedros Adhanom Ghebreyesus, ndërsa përshkroi pabarazinë e vazhdueshme në shpërndarjen e vaksinave nëpër botë si “groteske”.
Vaksina AstraZeneca, e cila, nga të dhënat e reja amerikane të hënën treguaoi se ishte e sigurt dhe efektive, pavarësisht nga disa vende që pezulluan vaksinimin për arsye shëndetësore, po prodhohet në një larmi vendesh, duke përfshirë SK BioScience të Koresë së Jugut dhe Institutin Serum të Indisë, sipas Reuters.
Tedros u ka bërë thirrje më shumë prodhuesve që të miratojnë këtë model për të rritur inventarin, përfshirë programin e shkëmbimit të vaksinave COVAX, i cili synon të përshpejtojë shpërndarjen e vaksinave në vendet në zhvillim.
“Hendeku midis numrit të vaksinave në vendet e pasura dhe numrit të administruar përmes COVAX po rritet dhe po bëhet më grotesk çdo ditë,” tha Tedros në një konferencë shtypi.
“Vendet që vaksinojnë njerëz të rinj dhe të shëndetshëm, sot që janë në rrezik të ulët të kontraktimit COVID-19, e bëjnë këtë në dëm të jetës së profesionistëve të kujdesit shëndetësor, të moshuarve dhe grupeve në rrezik në vendet e tjera”, theksoi shefi i OBSH-së.
Tedros shtoi se disa vende po garojnë për të vaksinuar tërë popullsinë e tyre, ndërsa të tjerët nuk kanë asgjë, gjë që krijon siguri afatshkurtër, por ai gjithashtu shtoi se kjo është një ndjenjë e rreme e sigurisë. /tesheshi.com/
