Presidenti amerikan, Barack Obama përcolli një goditje thumbuese ndaj kulturës së izolimit dhe fallsitetit, dhe një mbrojtje pasionante të fakteve dhe shkencës në adresimin përpara klasës së të diplomuarve në universitetin Rutgers.
Në fjalimin e tij që mbuloi një spektër të gjerë çështjesh, Obama veçoi pabarazinë e të ardhurave dhe propozoi mbylljen e hapësirave ligjore në pagesën e taksave për menaxherët e fondeve limit. Ai nënvizoi rëndësinë e votës dhe dhënies së llogarisë, dhe komentoi problemet e parasë në politikë e në ndryshimet e klimës.
“Një mur nuk mund ta ndalojë këtë”, tha ai, duke aluduar për propozimin e kandidatit republikan në garën e Shtëpisë së Bardhë, Donald Trump që dëshiron të ndërtojë një mur në kufirin mes Shteteve të Bashkuara dhe Meksikës.
“Çështja është se që të ndihmojmë veten, duhet të ndihmojmë të tjerët, jo të ngremë urën dhe të përpiqemi ta mbajmë të veçuar veten nga bota”.
Presidenti nuk e përmendi kandidatin Trump me emër, por ai e bëri të qartë objektivin e zemërimit të tij, duke iu referuar gjithashtu edhe retorikës nxitëse të biznesmenit ndaj muslimanëve, popujve hispanikë dhe grave.
Presidenti synoi në fjalimin e tij një dënim të ashpër të atyre që mbështeten në kulturën e injorancës së vullnetshme, gjë që bën qesharakë liderët e komentatorët që refuzojnë shkencën dhe faktet. “Ende, ne jemi konfuzë për këtë”, tha ai.
“Në politikë dhe në jetë, injoranca nuk është virtut”, tha Obama. “Nuk është e mirë që të mos dish se për çfarë flet. Kjo nuk i bën gjërat reale e nuk tregon sesi duhet të jenë. Kjo nuk është të sfidosh korrektesën politike. Kjo është thjesht të mos dish se çfarë flet”.
Obama komentoi gjithashtu natyrën e progresit në vetvete, me një stigmatizim të atyre që kanë shprehur mospajtim me premtimet e tij të fushatës dhe ambicjet e tij.
“Progresi i Amerikës nuk ka qenë kurrë i butë”, tha ai përpara një turme prej 40 mijë personash. Shtetet e Bashkuara, sipas tij, “mbeten një komb vërtet i ri. Progresi e ka rrugën me gunga”.
“Kështu ka qenë gjithnjë. Ëndërrimtarët dhe ata që kërkojnë progresin janë shenjat dalluese të këtij kombi. Harku i historisë është i lartë, por ai harkohet drejt Drejtësisë. Qëndroni për atë që besoni”.
Presidenti apeloi të sapodiplomuarit për të ndjekur ndryshimin në botë pavarësisht kaskadës së sfidave, dhe që t’I përballin këto sfida bashkarisht, si pjesë e një procesi politik. “Eshtë radha juaj tani për t’i dhënë formë fatit të kombit sikundër edhe tuajit”, tha presidenti.
Obama i kushtoi vëmendje të veçantë disa nga retorikave të fushatës presidenciale të vitit 2016, në të majtë dhe në të djathtë. “Themeluesit e kombit tonë lindën nga iluminizmi”, tha ai, duke shtuar se ndryshimi nuk është kurrë i papritur, madje, edhe kur vjen përmes “revolucionit politik” – një aludim ndaj retorikës së kandidatit demokrat, Bernie Sanders.
“Njerëzit në këtë kampus nuk u ndjenë mirë që Condoleezza Rice do të fliste në këtë podium, tha ai, duke iu referuar ish-sekretares amerikane të Shtetit të presidencës së George Ë Bush. “Tani, unë e pranoj se nuk është sekret, që nuk jam dakord me shumë nga politikat e Rice dhe administratës së mëparshme”, vijoi ai.
“Por, nocioni se komunitetit apo vendit mund t’i shërbehet më mirë duke mos dëgjuar komentet e ish-sekretares së Shtetit, apo duke refuzuar të dëgjohet ato çka ajo do të thoshte, – besoj se kjo është gabim. Nuk mendoj se demokracia funksionin kështu, më së miri”.
Obama argumentoi se ideja e një muri në kufijtë e Amerikës bie ndesh me parimet themeluese të kombit: “Bota është e ndërlidhur dhe po bëhet e tillë çdo ditë e më tepër. Të ndërtosh mure nuk do ta ndalë këtë”.
Kjo është një ide, tha presidenti që “jo vetëm bie ndesh me historinë tonë si kazani përzjerës i botës – por bie në kontradiktë me mënyrën e rritjes sonë, inovacionit dhe dinamizmit amerikan që është nxitur gjithnjë nga aftësia jonë për të tërhequr punëtorët më të palodhur nga çdo cep i botës”.
“Kështu u bë Amerika. Përse do të donim ta ndalonim tani?”, vijoi ai. “Nuk mund ta ndalim”.
Shtetet e Bashkuara, në mos e gjithë bota, sugjeroi presidenti, “është një një “pikë kontradiktash” ku po ndodhim ndryshime të mëdha.
“Ritmi i ndryshimit po përshpejtohet, duke ofruar mundësi të mëdha dhe rreziqe të mëdha”, paralajmëroi ai. “Bëni zgjedhjene duhur, larg nga frika dhe paraliza e drejt bashkëpunimit dhe shpresës”.
Në mbyllje, presidenti ofroi ato që i quajti “disa sugjerime sesi mund të ndryshoni botën”. E para mes tyre ishte një qasje e re nga Trump dhe sloganit të fushatës së tij për ta bërë Amerikën madhështore sërish. Obama u tha studentëve se duhet t’u rezistojnë atyre që këmbëngulin se e shkuara ishte më e mirë. “Shpesh, ditët e mira të vjetra nuk kanë qenë edhe aq të mira”.
Ata duhet të kërkojnë llogari nga liderët, dhe të kuptojnë se kur ekspertët anashkalohen si elitarë, “kemi një problem”.
Por, mbi të gjitha, ai apeloi studentët të votojnë, duke thënë se “apatia ka pasoja”. “Kini besim tek demokracia, nuk është gjithnjë e bukur, e di. Por ne e kemi jetuar dhe është mënyra sesi prodhojmë progres”.
Përgatiti: Juli Prifti- /tesheshi.com/
