Me ardhjen e qeverisë “Haradinaj” në pushtet, Kosovës do t’i shtohet edhe ministria e 22-të, ajo e Zhvillimit Rajonal, që do të jetë institucioni i re, synim i të cilës do të jetë zhvillimi plotësues i regjioneve më pak të zhvilluara në vend.
Së paku kështu thuhet në Programin e Qeverisë për vitet 2017-2022, që ka siguruar Gazeta Fjala. Krijimi i kësaj ministrie është përmendur edhe gjatë prezantimit të kabinetit nga Ramush Haradinaj.
Në këtë program thuhet se kjo ministri do të ketë këto departamente: për integrim të zhvillimit rajonal dhe për infrastrukturën lokale dhe rajonale, të cilat më pas do të ndahen tre e më shumë sektorë.
“Në Departamentin për integrim të zhvillimit rajonal, janë të paraqitura propozimet si në vijim që të ndahen në: Sektori për zhvillim rajonal, Sektori për bashkëpunim ndërkufitar dhe Sektori i për koordinim dhe bashkëpunim ndërsektorial për përdorimin e mjeteve te BE dhe burimeve të tjera ndërkombëtare”, thuhet në planin qeverisës.
Edhe për departamentin për infrastrukturën lokale dhe rajonale, janë paraqitur propozimet për ndarjen e sektorëve.
Për departamentin për infrastrukturën lokale dhe rajonale janë të paraqitura propozimet si në vijim: Sektori për zhvillim dhe mbikqyrje të projekteve, Sektori për bashkëpunim me vetëqeverisjet lokale dhe Sektori për zhvillim të zonave kodrinore-malore”.
Përmes kësaj ministrie dhe departamenteve synohen të krijohen kushtet dhe të kryhen aktivitetet për planifikim dhe implementim të programeve të destinuara për zhvillimin e njësive të vetëqeverisjes lokale në regjionet më pak të zhvilluara si dhe arritja e zhvillimit ndërkufitar dhe ndër-rajonal.
“Ministria e zhvillimit rajonal do të punojë për të zvogëluar mungesën e baraspeshës në zhvillimin e rajoneve të veçanta dhe do të ndihmojë në krijimin e parakushteve për zhvillimin e qëndrueshëm ekonomik dhe social, përmes programit dhe masave për ngritjen ose modernizimin e infrastrukturës komunale dhe sociale, bazuar në partneritet dhe solidaritet”, thuhet në planin qeverisës. /tesheshi.com/
