Kryeministri i Papua Guinesë së Re, James Marape tha se vendi i tij nuk e meriton të lidhet me kanibalizmin dhe i bëri thirrje SHBA-së të pastrojë mbeturinat e Luftës së Dytë Botërore të shpërndara në të gjithë Paqësorin, pas komenteve të Presidentit Joe Biden për xhaxhain e tij të zhdukur.
Biden “duket të nënkuptojë se xhaxhai i tij ishte ngrënë nga kanibalët pasi avioni i tij u rrëzua mbi Papua gjatë Luftës së Dytë Botërore”, tha zyra e Marape.
“Deklaratat e Presidentit Biden mund të kenë qenë një lapsus, megjithatë, vendi im nuk e meriton një etiketë të tillë”, shtoi Marape.
“I bëj thirrje Presidentit Biden t’i propozojë Shtëpisë së Bardhë që këto mbetje të Luftës së Dytë Botërore të pastrohen në mënyrë që të dihet e vërteta për ushtarët e humbur si Ambrose Finnegan.”
Një “lidhje personale” me Papuan
SHBA nënshkroi një marrëveshje bashkëpunimi për mbrojtjen me Papua Guinenë e Re vitin e kaluar në mes të një konkurrence për ndikim në rajon me Kinën, e cila ka një pakt sigurie me ishujt fqinjë Solomon.
Biden ka përmendur më parë lidhjen e tij personale me historinë e kohës së luftës të Papua Guinesë së Re, duke treguar historinë e xhaxhait të tij që vdiq në një aksident avioni në maj 1944.
Pasi vizitoi një memorial për ushtarët e zhdukur në Pensilvani, ai tha javën e kaluar se ekzistonte mundësia që xhaxhai të ishte viktimë e kanibalëve.
Historianët thonë se Papua Guinea e Re ishte çelësi i shtytjes amerikane në të gjithë Paqësorin për të çliruar Filipinet në Luftën e Dytë Botërore.
Papua Guinea e Re dhe Ishujt Solomon janë ende plot me mbetje eshtrash njerëzish nga lufta, rrënoja avionësh dhe anijesh, tunele, si dhe bomba të pashpërthyera që ende po vrasin njerëz. /tesheshi.com/
