Senati amerikan ka konfirmuar Loretta Lynch-in në postin e prokurores së përgjithshme të SHBA-ve. 55-vjeçarja Lynch, e para femër me ngjyrë në këtë detyrë, zëvendëson Eric Holder-in.
Pararendësi i saj e përshkroi atë si një prokurore të talentuar, një profesioniste të përkryer, e si një nëpunëse të përkushtuar.
“Jam i kënaqur që senati i Shteteve të Bashkuara ka njohur nevojën për konfirmimin e saj si prokurore e përgjithshme. Loretta ka fituar besimin dhe vlerësimin e lartë si të përkrahësve dhe të kundërshtarëve të saj në çdo etapë të karrierës së vet. Ajo ka treguar një përkushtim të palëkundur ndaj sundimit të ligjit në çdo rast dhe në çdo rrethanë,” qenë fjalët e Holder-it.
Lynch-i, e cila ka qenë deri tani prokurore e distriktit lindor të Nju Jorkut, mori 56 vota pro saj në votimin në senat, vetëm 3 më tepër se ç’pati marrë Michael Mukasey në 2007-n, me numrin më të vogël të votave të dhëna për miratimin e një prokurori të përgjithshëm. Votimi për kryeprokuroren u shty për javë të tëra për shkak të debateve mbi një sërë çështjesh të tjera. /tesheshi.com/
