Nga Ylli Pata
Në Maqedoni ka startuar fushata për zgjedhjet lokale. BESA, e vetmja parti në nivel mbarëshqiptar që si e re nuk po mbetet periferike, e që është faktorizuar brenda një kohe të shkurtër, pritet të jetë sërish surprizë. Dhe të mendosh që nuk është ekstreme, i asnjë kahjeje. Përkundrazi, ka një gjuhë tejet të elaboruar dhe intelektualitet me shumicë…
Zgjedhjet lokale në Maqedoni kanë një veçori në krahasim me votimet që janë zhvilluar që prej 25 viteve. Duke parë suksesin e Zaev-it në zgjedhjet parlamentare të vitit të shkuar, i cili siguroi 70 mijë vota shqiptare, edhe njeriu më i urryer ndër shqiptarë, kreu i VRMO-së, Nikolla Gruevski me partinë e tij ka nisur një gjueti reale për votat e shqiptarëve. Dhe kjo jo vetëm në Shkup ku Gruevski synon të marrë bashkinë e madhe me Koce Trajanovskin, por edhe në qytete të tjera të vendit.
Mirëpo ky fenomen po shikohet edhe si një rëndësi strategjike për shqiptarëve, që po ashtu mund të jetë një kurth nëse nuk do të mendohet mirë, ngaqë dy partitë e mëdha maqedonase, votat e shqiptarëve i kërkojnë për aspekt taktik dhe aspak strategjik.
Sidomos Gruevski, pasi ndoshta Zaev me suksesin e zgjedhjeve parlamentare mund ta konsiderojë si një element permanent aleancën me shqiptarët çka solli edhe koalicionin e tij qeveritar, që megjithatë ende nuk ka një implementim parimor.
Deri tani, Zoran Zaev e ka konsideruar aleancën e tij me BDI-në e Ali Ahmetit dhe me Aleancën e Zijadin Selës një koalicion më shumë për të larguar “të keqen” e Nikolla Gruevskit sesa si një bashkim për një program të përbashkët që do t’i japë fund ksenofobisë dhe do të sjellë një Maqedoni më shumë qytetare dhe të drejtë.
Pikërisht në këtë pikë kemi një zhvillim të rëndësishëm që duhet analizuar me kujdes dhe me ftohtësi.
Në kohën e kulmit të skandaleve të përgjimeve, apo edhe oparacionit të “Lagjes së Trimave”, doli në skenë një forcë e re politike e përbërë nga intelektualë të rinj të panjollosur në qeverisjen e vendit apo edhe në kastat politike.
Bëhet fjalë për Lëvizjen BESA.
BESA, ndonëse ngjante me Vetëvendosjen e Kosovës si lëvizje qytetare ajo kurrë nuk mori një aksion reaktiv kundërshtues, por qëndroi në suazat civile të veprimit të një opozite.
BESA si parti e re anti-establishment hartoi dhe mbrojti një atu politike që më shumë ishte një aksion: largimin e VMRO-së nga qeverisja si forcë politike antishqiptare dhe qëndrimin më pas në opozitë pa e patur qëllim në vetvete pushtetin, por kauzat.
Dhe për këtë BESA siç u vu re më pas nuk pati asnjë interes portofolesh. Pasi me vullnet politik nuk hyri në qeverinë e Zoran Zaevit, megjithëse qe partia e parë që e mbështeti si mundësi daljeje nga kriza e madhe pa as më të voglin dyshim.
Ishte BESA që involvoi në aksion aktorët dhe faktorët gjithë shqiptarë dhe ata ndërkombëtarë.
Shpesh me tollovinë e informacionit që jepet çdo por pa analizuar, janë harruar faktet e takimeve të përditshme me ambasadorët e huaj në Shkup, por edhe përpjekjet për të bashkuar faktorin shqiptar.
Madje kryeministri shqiptar Edi Rama e ka pranuar edhe publikisht se ka qenë BESA që ka inicuar një takim në Tiranë të parrtive politike shqiptare për tu mbledhur dhe për të arritur në një qëndrim të përbashkët.
BESA si forcë e re politike zuri vendin e PDSH-së që u zhduk politikisht në zgjedhje, duke ndjekur premisat dialektike të një rritjeje jo me “shiringa trandicionale”, pra me para, lidhje klienteliste, tribale apo edhe me kërcënime, por vetëm me kontakte normale, narrativë korrekte dhe bindëse, dhe padyshim thelb.
Kjo e shndërroi BESËN në të vetmen parti shqiptare në këto 27 vite, që arrin të faktorizohet shumë shpejt dhe mos jetë thjesht një flluskë sapuni, ngjashëm si në rastet e fundit të LIBRA-s së Blushit apo e “Sfida për Shqipërinë” e Gjergj Bojaxhiut në Shqipëri.
Pasi morri 5 deputetë në të parin ballafaqim elektoral, në zgjedhjet parlamentare të dhjetorit të kaluar, tashmë BESA ka synim këto zgjedhje marrjen e Çairit, bastion i BDI-së. Këtë komunë të Shkupit, simbol të shqiptarëve, BESA e ka fituar me rezultat elektoral që në dhjetor, e tashmë pritet ta marrë dhe si drejtim.
Në zgjedhjet e kaluara thuajse çdo parti e kishte targetin e vet: VRMO synonte administratën, BDI po ashtu të punësuarit në shtet, PDSH të fortët, e LSDM-ja ish-komunistët.
Ndërsa tani secila prej partive është thelluar të bëjë program, të kijojë një imazh dhe të gjejë kandidatë më silësor. Dhe ky duhet thënë se është një ndryshim epokal i cilësisë politike në Maqedoni.
Këtë ndryshim e bëri BESA- me vetëm pak gjë: integritet, seriozitet dhe dije, duke u mbështetur tek besimi, një shtyllë fondamentale për shqiptarët në Maqedoni.
BESA eci si “thika në gjalpë” pasi ishte gati ambjenti; ai po priste vettëm mesazhin dhe njerëzit e duhur.
E në fakt kjo është dialektika politike; metodat e tjera që janë përdorur këto 25 vjet duke luajtur me frikën e njerëzve është dritëshkurtësi.
Ndaj dhe mesazhi i BESA-s ngjit. Dhe siç po duket po kthehet edhe në një “pandemi” politike jo vetëm në Maqedoni por dhe në viset e tjera shqiptare. E në qoftë kështu, ardhtë e bardhë! /tesheshi.com/
