Nga Harrilla Koçi
Himarë-Kohë më parë, Robert e Sabrina Fitstung, zgjodhën për të dytin vit rradhazi të kalojnë pushimet në bregdetin e Himarës, Vlorë. Së bashku me tre fëmijët, më e madhja 10 vjeçe dhe më i vogli vetëm pothuajse 2 vjeç, ata u nisën nga qyteti i tyre, Mynihu (Gjermani), për të ardhur në Gjipe, një nga gjiret më të mrekullueshme të bregdetit himariot dhe ndoshta të të gjithë vijës bregdetare shqiptare. Ishin të pasionuar pas turizmit me kampera dhe këtu ata gjetën të gjitha kushtet për ta shijuar atë. “Një vit më parë, teksa ktheheshim nga Igumenica (Greqi), mësuam se edhe në Shqipëri lejohej kjo kategori turizmi. Vendosëm dhe shtuam edhe disa ditë në pushimet tona për t’i kaluar këtu në Himarë dhe nuk u zhgënjyem”, tregonte Sabrina, teksa mbante në duar foshnjën e vet, Davidin 2 vjeç. Ajo thoshte se kjo natyrë është tepër joshëse, pothuajse e virgjër. Sipas saj, këtu njeriu ndihet pjesë e natyrës.
Kamperi i tyre, një automjet i lartë, ishte vendosur nën hijen e rrepeve në atë mjedis të gjelbër pranë kanioneve që ngrihen të thepisur vetëm pak qindra metra larg bregut të detit. 5 pjesëtarët e familjes Fitstung këtu shijonin gjithçka, jo vetëm detin, që i ftonte vazhdimisht me kthjelltësinë e tij të pafund. Në atë kënd që ata kishin zgjedhur, ngritën edhe një çadër të vogël, vendosën një tryezë gjithashtu të vogël pranë saj, ku uleshin për të konsumuar ushqimin që e përgatisnin në kuzhinën portative. Gjatë kësaj kohe, kujdeseshin për territorin ku ishin vendosur. Hiqnin edhe ndonjë letër apo qeskë plasmasi, që era e lehtë e sillte në breg të detit
Herë herë, dy fëmijët pak më të rritur, Stina 10 vjeçe dhe Samueli 8 vjeçar, hynin pa droje në thellësi të mjedisit të gjelbër ku spikasnin shkurret dhe disa pemë fiqsh dhe këpusnin nga degët frutat pothuajse të pjekura, të cilat ata i pëlqenin mjaft. Ndërkohë, Roberti e Sabrina, organizonin edhe piknik në thellësi të kanioneve ku shkëmbinjtë ngrihen pingul në lartësi dhjetra metrash.
Të kënaqur me gjithçka përjetuan një vit më parë, bashkëshortët Fitstung vendosën që këto pushime t’ja kushtonin tërësisht Shqipërisë. Hynë përmes pikës kufitare të Qafë Thanës dhe vazhduan në veri. Shkuan në Koman dhe në Kukës, ku natyra i tërhoqi mjaft. Pastaj u nisën drejt jugut. Për Gjipenë, nuk gjenin fjalë ta përshkruanin. “Na pëlqeu edhe Kukësi edhe Komani, ndërkohë që këtu në Gjipe gjithçka flet vetë”, thoshte Roberti, që drejton një biznes të elementëve fotovoltaikë në qytetin e vet. Krahas pushimeve, ai gjeti pak kohë të marrë edhe informacione për ato që lidheshin me biznesin e tij, me panelet diellore. Kishte mësuar se në bregdetin e Himarës, mjaft nga komplekset turistike shfrytëzojnë energjinë nga panelet diellore.
Por, gjithsesi, këto drejtime, zinin shumë pak vend në bashkëbisedim. Për bashkëshortët gjermanë, kryesore ishin pushimet. Qëndruan mjaft ditë. Pastaj u nisën në rrugën e kthimit. Udhëtuan përgjatë bregdetit, për të vizituar kështjellën e Ali Pashë Tepelenës në Porto Palermo e në Sarandë.
Këtë vit, ata do të vijnë sërish. U ka lënë mbresa natyra dhe bregdeti shqiptar. Por, edhe mjaft bashkëkombas të tyre. Gjatë këtyre ditëve, plazhi i Gjipesë është populluar mjaft. Mes tyre, një numër i madh janë turistë nga Gjermani, por edhe nga vende të tjera si Polonia, Çekia, Franca, Italia, Mali i Zi, Maqedonia. Të gjithë me kampera, janë bërë banorë shumëditorë të kësaj pjese në bregdetit shqiptar.
Numri i tyre ka ardhur në rritje. Mungesa e një pjese të rrugës, nuk ndikon fare në përzgjedhjen që kanë bërë. Automjetet me të cilat kanë ardhur janë plotësisht të përshtatshme për të mbërritur në destinacion. Madje, ky fakt, duket se e bën edhe më interesant udhëtimin e tyre, për të shijuar natyrën dhe kthejlltësinë e ujit të detit, në këtë zonë të virgjër. /tesheshi.com/
