Një fëmijë dy vjeç, i braktisur dhe me shenja kequshqyerje, është gjetur nga policia, ndërsa ushqehej në mënyrë kafshërore, nga një qen në afërsi të një ofiçine mekanike në Arica, një qytet në Kili.
Burime zyrtare të cituara nga shtypi lokal kanë informuar se në bazë të një denoncimi në polici, është arritur të zbulohet qoshja në ofiçinë, ku është gjetur fëmija në kushte shumë të këqija higjienike, pa këpucë, gjysmë i zhveshur, i kequshqyer dhe me sëmundje në lëkurë. “Ndërsa fëmija ushqehej nga qeni, nëna e tij ndodhej në një pjesë tjetër të ndërtesës, tërësisht e dehur”,- thonë burimet zyrtare.
I vogli u dërgua me urgjencë në spital, ku mjeku Juan Noé në Arica, po kujdeset për mirëqenien e tij dhe për normalizimin e gjendjes shëndetësore të të voglit. E ëma është marrë në pyetje dhe do të duhet të dalë përpara një gjykate, ku do të japë llogari për papërgjegjshmërinë e treguar nga ana e saj, ndërsa tashmë ka humbur kujdestarinë e fëmijës./tesheshi.com/
