Shtimi i rasteve të dëmtimit të fidrave të energjisë elektrike nga punimet e firmave private ka detyruar Operatorin e Shpërndarjes së Energjisë Elketrike të ndërmarrë nisma ligjore për sanksionimin e tyre.
Nga Lapraka, ku u shënua një rast abuziv, administratori i OSHEE-se, Adrian Çela tha se OSHEE është e detyruar t’i propozojë qeverisë disa nisma ligjore per forcimin e sanksioneve ndaj subjketeve private dhe institucioneve qe financojne projektet e tyre. Sipas tij, pavarësisht denoncimeve të përsëritura, frmat vijojnë të shkëpusin energjinë, në interes të punës të tyre.
“Ka patur shumë raste që kompani të ndryshme, qëi kemi denoncuar 2-3 herë rresht, si “Salillari” apo “Albavia”, kanë punuar për Unazën e Madhe ose të Kodra e Diellit, zona këto që janë kthyer në gangrenë për OSHEE dhe abonentët e saj, për shkak të dëmtimeve të shumta, duke lënë banorët për orë të tëra pa energji elektrike, edhe pse OSHEE ka investuar në ato zona. Doja t’ju bëj me dije se, po marrim nisma ligjore dhe do t’ia propozojmë edhe Këshillit të Ministrave për të parashikuar sanksione të forta ndaj kompanive që dëmtojnë linjat tona, madje deri në konfiskim të garancive apo ndërprerje të energjisë elektrike të atyre institucioneve që financojnë këto punime”, tha Çela.
Sipas tij, OSHEE, nga ana e saj i ka paraqitur këto raste në organet kompetente, por rezultati është i papërfillshëm. Ai tha se gjatë ditëve të fundit janë shënuar dhjetëra raste të demtimeve të fidrave, duke lënë banorët pa drita.
“Vetëm në pesë ditët e para të muajit dhjetor 2016 kemi 6 dëmtime të linjave tona nga operatorë të tillë. Në muajin Nëntor për qytetin e Tiranës kemi 15 dëmtime të kryera nga kompani private për llogari të institucioneve publike. Këto dëmtime, nuk sjellin vetëm kosto te linjat apo fidrat tanë, por zhvlerësojnë investimet tona, dhe më e rëndësishmja, tjetër kosto është se lënë pa drita abonentët familjarë dhe bizneset, për aq kohë sa duhet riparuar linja. Dy ditë më parë denoncuam subjektin privat, “CoGet”, e cila po punon për Koperacionin Italian në sistemin e ujësjellësit, e cila dëmtoi linjat tona, duke lënë për mbi 3 orë banorët pa energji elektrike. Po sot, e njëjta firmë, dy metra më tutja, ka dëmtuar sërish, në dy pika të ndryshme, linjën e tensionit të mesëm dhe linjën e tensionit të ulët, duke lënë 3500 abonentë pa energji elektrike në zonën e Laprakës”, përfundoi administratori i OSHEE-së, Adrian Çela./tesheshi.com/
