Flamuri i Palestinës gjendej mes të ndaluarve nga Eurovizioni për t’u tundur gjatë netëve të festivalit europian të këngës që do të zhvillohet në Suedi. Dhe kjo nuk është pritur mirë nga palestinezët, që duan tashmë një ndjesë prej Eurovizionit.
Numri dy i Organizatës për Çlirimin e Palestinës, Saeb Erekat, i ka dërguar një letër presidentit të Unionit Europian të Transmetimeve.
Në letrën për Jean-Paul Philippot-in thuhet: “Festivali i këngës i Eurovizionit do të mbahet këtë vit në Stokholm, në Suedi, në shtetin e parë anëtar të BE-së në Europën Perëndimore që do ta njihte zyrtarisht shtetin e Palestinës. Vendimi juaj është tërësisht i njëanshëm dhe i papranueshëm.”
Të turpshëm e ka cilësuar Erekat vendimin, për të cilin do që Eurovizioni të kërkojë ndjesë.
“Ne u bëjmë thirrje ta prapësoni menjëherë këtë vendim të turpshëm. Gjithashtu është e nevojshme që Unioni Europian i Transmetimeve t’i kërkojë ndjesë Palestinës, si dhe miliona palestinezëve anekënd botës.”
Një festival tanimë me reputacion të rënë përtokë, me një votim që nuk ka të bëjë aspak me këngët, si dhe vetë çmimet, ky organizim europian është kritikuar ashpër këto ditë për direktivën e ndalimit të flamujve gjatë zhvillimit të tij. Mes flamujve të ndaluar për t’u valëvitur është dhe ai i Kosovës. /tesheshi.com/
