Marrëdhëniet amerikano-ruse rrezikojnë të përkeqësohen akoma më tej pasi Moska premtoi se do të marrë hak për masat ndëshkuese të Uashingtonit mbi pretendimin për ndërhyrje në zgjedhjet presidenciale.
Kremlini fillimisht i ka hedhur poshtë akuzat amerikane për ndërhyrje kibernetike. Përndryshe, zëdhënësi i Kremlinit, Dmitry Peskov, e ka akuzuar administratën e Obama-s për përpjekje për t’i shkatërruar përfundimisht marrëdhëniet mes SHBA-së dhe Rusisë, që tashmë kanë arritur në një pikë të ulët.
Peskov e bëri të qartë se Moska do të reagojë në një mënyrë adekuate, “mbështetur në parimin e reciprocitetit”.
Zëdhënësja e Ministrisë së Jashtme Ruse, Maria Zakharova, paralajmëroi gjithashtu gjatë orëve të natës përmes llogarisë së saj në Facebook se sot do të ketë deklarime zyrtare, kundërmasa e plot gjëra të tjerë.
Dmitry Peskov, në anën tjetër, ka kujtuar se nuk do të ketë nxitim, e se Putin-i do ta ketë në konsideratë faktin se Obama-s i mbeten vetëm tre javë në detyrë, duke shpresuar në përmirësimin e marrëdhënieve me të hyrë Donald Trump në Shtëpinë e Bardhë.
35 diplomatë të ambasadës ruse në Uashington dhe të konsullatës në San Françisko u shpallën dje të padëshiruar dhe u urdhëruan të largohen nga SHBA-ja brenda 72 orëve. Mbyllja e dy ndërtesave ruse në Nju Jork dhe Meriland, si dhe sanksionet ndaj agjencive të inteligjencës ruse, GRU dhe FSB, ishin ndër masat e marra nga administrata amerikane. /tesheshi.com/
