Nga Musa Mustafa
Një pjesë e qytetit të Mitrovicës si dhe të fshatrave përrreth lumit Sitnica janë në ankth nga vërshimet që është duke i shkaktuar lumi më i gjatë i rrafshit të Kosovës.
Autoritetet komunale iu bëjnë thirrje banorëve që të bashkëpunojnë me ekipet emergjente në terren pasiqë lumi në fjalë ka mundësi që ende të fryhet duke rrezikuar edhe jetën e banorëve.
Qindra mijra hektarë tokë buke janë të përmbytura që nga Obiliqi e deri në Mitrovicës, por që pas reshjeve të së dielës është duke u rrezikuar nga përmbytja edhe parku i bizneseve që gjendet buzë këtij lumi.
“Situata është mjaft serioze, gjë që paraqet rrezik serioz për vërshime shumë më të mëdha të shtëpive dhe bizneseve që shtrihen përgjatë lumit”, ka thënë drejtori i Drejtorisë për Emergjenca në komunën e Mitrovicës, Musa Dragaj.
“Uji që ka dalë nga shtrati ka vërshuar disa shtëpi në ish-stacionin e vjetër hekurudhor në fshatin Frashër, pastaj ka rrezikuar për ta vërshuar tërësisht bizneset si ‘Vila LUX’, ‘Mitrometali’, ‘Scania Trans’, dy ferma të lopëve; e nëse vazhdon kështu, është në rrezik edhe parku i bizneseve ku janë dhjetëra kompani”, ka shtuar ai.
Dragaj ka thënë po ashtu se reshjet e shiut e kanë dëmtuar shumë dhe rrugën që lidh “Lagjen e Doktorëve” me “Kroin e Vitakut”, në veri të qytetit, ku gjysma e rrugës së asfaltuar është shembur tërësisht dhe paraqet rrezik për qarkullimin e njerëzve dhe.
Sipas tij, situata është mjaft serioze dhe se fryerja e lumit Sitnica po vazhdon, gjë që paraqet rrezik serioz për shtëpitë dhe bizneset që shtrihen përgjatë lumit.
Ai ka bërë të ditur se Sitnica ka vërshuar në disa shtëpi në lagjen “2 Korriku”, afër urës kryesore mbi këtë lum, në hyrje të qytetit, ndërsa është duke u rrezikuar edhe parkun e bizneseve.
“Komuna ka marrë të gjitha masat për të parandaluar situatat më të rënda e më të rrezikshme. Zjarrfikësit kanë dalë në terren dhe të gjitha familjeve të prekura nga uji ju kemi ofruar evakuim, por ato tash për tash e kanë refuzuar këtë. Në rrugën që lidh dy lagjet e lartpërmendura në veri të qytetit, policia ka dalë në vendin e ngjarjes dhe ka vendosur shiritat që paralajmërojnë rrezikun për qarkullim”, theksoi Dragaj.
Në anën tjetër, edhe kryetari i komunës, Agim Bahtiri i ka ftuar banorët që të jenë të kujdesshëm dhe të lajmërojnë Drejtorinë për rrezikun që iu kanoset, pasiqë zyrtarët komunalë do të jenë vazhdimisht në gjendje gadishmërie për të ndihmuar. Bahtiri ka kërkuar nga banorët që janë të rrezikuar që të jenë koperativ dhe të bashkëpunojnë me ekipet në terren në mënyrë që jeta e tyre të mos rrezikohet. “Kërkojë nga banorët që nëse ekipet emergjente kërkojnë ta lëshojnë shtëpinë ata duhet ta bëjnë një gjë të tillë, pasi që në pyetje është jeta e tyre”, ka theksuar Bahtiri. /tesheshi.com/
