I ftuar në një tryezë të përjavshme të agjencisë së lajmeve Anadolu Agency, ministri turk i Drejtësisë ka përsëritur akuzat për mbështetje të terroristëve nga Europa, si dhe për sjelljen aspak pozitive të ca vendeve të BE-së ndaj Turqisë.
Bekir Bozdağ deklaroi sot se disa vende të Bashkimit Europian nuk duan të shohin një Turqi të qëndrueshme dhe të fortë ekonomikisht.
Përfundimi i tij i referohet dhe qëndrimit më të fundit të disa vendeve, që kanë penguar aktivitetet e shtetarëve turq me bashkatdhetarët e tyre.
“Pas vëzhgimit të qëndrimit të Gjermanisë, Holandës, Austrisë dhe ca vendeve të BE-së, e kuptoj se sa e rëndësishme është përpjekja jonë për ta ndryshuar sistemin.”
Për të, sistemi aktual, ai parlamentar, nuk garanton qëndrueshmëri, e doemos duhet zëvendësuar me atë presidencial.
Ai i akuzoi po ashtu vendet perëndimore për strehim të terroristëve dhe të puçistëve të 15 korrikut.
“Ministrat e qeverisë legjitime të Turqisë nuk mund të flasin në Holandë, por organizata terroriste PKK mund të organizojë mitingje dhe manifestime atje,” theksoi Bozdağ, duke mos harruar të përmendë dhe Gjermaninë, që e lejon të njëjtën organizatë të ketë tubime.
Ministri e quajti të papranueshëm faktin se vendet europiane mbrojnë këdo që përpiqet t’i bëjë dëm Turqisë.
Retorika e zyrtarit turk reflekton edhe një herë tjetër pakënaqësinë e thellë të autoriteteve të Turqisë për qasjen e vazhdueshme negative ndaj vendit të tyre në Europë. /tesheshi.com/
