Kisha katolike Shkodër ka celebruar një meshë për viktimat e shkaktuara nga aktet terroriste në Paris. Mesha u celebrua ne kishën Kapele te varrezave të Rrmajit, vendi ku janë ekzekutuar Martirët e Kishës Katolike nga regjimi komunist. Të rinjtë janë lutur për shpirtin e viktimave në Francë, për paqen dhe mirësinë.
“Ne jemi sot me Francën, simbolin e lirisë e të qytetërimit, jemi me popullin francez në këtë ditë tragjedie. Ata që kryejnë akte të tilla terroriste nuk janë besimtarë, nuk janë as katolikë edhe as myslimanë, por janë njerëz me tru të shpërlarë”, tha në këte meshë Famullitari i Shkodrës, Dom Artur Jaku.
Në vijim, Dom Artur Jaku theksoi se prirja nga toleranca, mirëkuptimi dhe forcimi i besimit ndaj njëri tjetrit, janë qëllimet e mëdha për të cilat duhet të punojmë të gjithë. “Jo hakmarrje e mëri, por paqe e mirëkuptim. Për këtë ka nevojë njerëzimi. Mesazhi i martirëve shqiptarë që u vranë për idealet e tyre nga regjimi komunist, është: “Fali o Zot se nuk dijnë ç`bëjnë!”, theksoi Dom Artur Jaku në meshën dhe lutjet për viktimat e akteve terroriste në Paris. /tesheshi.com/
