Të shtëna dhe shtatë shpërthime me të paktën 129 persona që ngelën të vdekur kanë goditur mbrëmjen e së premtes për herë të dytë brenda vitit, zemrën e Parisit në Francë. Janë mbi 352 të plagosur, 99 prej së cilëve në gjendje të rëndë.
Për presidentin francez bëhet fjalë për një sulm ‘të paprecedent’. Një qëndrim të ashpër ka mbajtur edhe Liga Arabe në lidhje me këtë çështje. Në Francë është shpallur gjendja e emergjentes. Ushtria është përhapur në të gjithë kryeqytetin dhe në rrethinat e tij. Deri më tani është zbuluar identiteti i tre atentatorëve, të cilët janë belg ndërsa përndjekje dhe arrestime janë bërë edhe në Bruksel.
Dy automjete janë përdorur gjatë atentatit të mbrëmshëm, një Seat i zi nga i cili janë bërë gjuajtjet me armë dhe një makinë tip Polo, me ngjyrë të zezë me targa belge e parkuar përpara Bataclan nga terroristët, të cilët më pas kanë hyrë në teatër. Prokurori Francois Molins ka bërë me dije se makina tip Polo me ngjyrë të zezë drejtohej nga një shtetas francez banues në Belgjikë, i cili është arrestuar mëngjesin e sotshëm duke drejtuar një tjetër makinë në kufirin mes Francës dhe Belgjikës. Bashkë me të u arrestuan edhe dy qytetarë belg.
Sulmet e koordinuara u zhvilluan në gjashtë vende në Paris, përfshirë një teatër, Stade de France dhe të paktën dy restorante. Tetë prej terroristëve ndërruan jetë, shtatë prej tyre në vetëvrasje prej bombave, raporton CNN. Mediat franceze, duke cituar burimet policore, bëjnë me dije se një pasaportë siriane u gjet pranë njërit prej kamikazëve, por kjo nuk do të thotë se medoemos personi ishte nga Siria. Presidenti Francois Holonde ndodhej në Stade de France në momentin e ngjarjes, kur po luhej ndeshja miqësore me Gjermaninë. Ai u evakuua në mënyrë të menjëhershme, pa pësuar asnjë dëmtim.
Në brendësi të Bataclan dhe gjatë shkëmbimit të zjarrit me forcat e rendit, teroristët “kanë përmendur shtetet Siria dhe Irak”, bëri me dije prokurori i Parisit, Francois Moulins. Ai shtoi se vetëm në Bataclan kanë ndërruar jetë 89 persona, si pasojë e sulmit.
“Franca duhet të ndalojë organizatat islamike dhe të mbyllë xhamitë radikale. Gjithashtu nuk duhen pranuar as të huajt që predikojnë urrejtjen në territorin tonë, siç janë klandestinët, të cilët nuk duhet të qëndrojnë këtu”,- ka deklaruar presidentja e Frontit Naciona, Marine Le Pen.
“Të gjithë europianët janë të ftuar të bashkohen në një minutë heshtje në kujtim të viktimave të atentatit në Paris ditën e hënë në mesditë”,- deklaruan liderët e 28 vendeve të BE-së.
“Gjithçka që mund të bëhet në nivel evropian për të garantuar sigurinë e Francës, do të bëhet, ashtu sikurse është e rëndësishme të fitojmë ndaj ekstremizmit, terrorizmit dhe urrejtjes”,- shtohet në deklaratën e tyre./tesheshi.com/
